Вашингтон Украина Президенти Владимир Зеленский билан муносабатда бўлмагани маъқул. Бу ҳақда АҚШ Президенти Дональд Трамп NewsMax’га берган интервьюсида сўз очди.

“Зеленский – биз муносабатда бўлишимиз керак бўлган одам эмас. У можарони ҳал қилишни хоҳлаётганини айтади, лекин ундай эмас. Мен Зеленскийнинг катта мухлиси эмасман. Улар Украинани вайрон қилишди. Мен уни П.Т. Барнум (машҳур шоумен) деб атайман”, дейди у.

Сиёсатчи, шунингдек, Киев режими раҳбари билан келишиш Россия Президенти Владимир Путинга қараганда қийинроқ эканини таъкидлаган.

Шу билан бирга, Оқ уй раҳбари Украинадаги можаро тез орада тугаши мумкинлигини тахмин қилган. Унинг фикрича, Москва, эҳтимол, музокараларни энди Зеленский билан олиб бормайди.

Бундан ташқари, Америка етакчиси Киевга кўрсатилаётган ҳарбий ёрдамни кескин танқид қилган. Унинг айтишича, Жо Байден администрацияси даврида Украина жуда кўп миқдорда қурол-яроғ олган ва Киев уларнинг бир қисмини шунчаки қайта сотиб юборган. Президент ҳозирда Қўшма Штатлар бу каби етказиб беришларга бўлган муносабатини қайта кўриб чиққанини қўшимча қилган.

“Сўнгги пайтларда биз ўқ-дориларни шунчаки ўзимизда олиб қоляпмиз, чунки улар ўзимизга керак. Улар захирамизда бўлиши зарур. Захираларимизни тўлдириб олганимиздан сўнг, ҳақиқатан ҳам тўлдиргач, иттифоқчиларимизга уларни биздан сотиб олишга рухсат беришни бошлаймиз”, дея хулоса қилган Трамп.

Эслатиб ўтамиз, аввалроқ Оқ уй раҳбари Дональд Трамп Владимир Зеленскийни кескин танқид қилиб, Украина битимлар тузишга қодир бўлган янги етакчи топиши кераклигини айтган эди. Кейинчалик ОАВ Украинанинг янги президенти лавозимига тўртта номзод номини келтирди. Зеленскийнинг ўзи эса, агар Россия 60 кунлик тўлиқ ўт очишни тўхтатишга рози бўлса, президентлик сайловларини ўтказишга тайёрлигини билдирган. Бунга жавобан Кремль Зеленскийнинг Украинада сайловлар ўтказиш учун икки ойлик сулҳ тузиш ҳақидаги таклифини рад этган.