“Путин кўпчиликни алдаган, лекин мени алдолмайди” — Трамп 

Агар Россия ва Украина ўртасида 50 кун ичида келишув бўлмаса, АҚШ Россияга қарши “жуда қаттиқ” божлар жорий этади. Бу ҳақда АҚШ президенти Доналд Трамп НАТО бош котиби Марк Рютте билан ўтказилган матбуот анжуманида маълум қилган.

Трамп Россия Федерацияси президенти Владимир Путин билан тез-тез суҳбатлашишини, аммо бу суҳбатлар натижа бермаслигини, чунки Россия раҳбари бошқаларни алдашда давом этаётганлигини билдирган.

“Мен у билан урушни тўхтатиш кераклиги ҳақида кўп гаплашаман. Гўшакни қўйиб, ажойиб суҳбат бўлди дейман. Кейин яна ракеталар уча бошлайди. Бу ғалати, деб ўйлайман. Бундай ҳолат 3-4 марта такрорлангач, бу суҳбатларнинг ҳеч қандай маъноси йўқлигини тушуниб етдим”, дейди Трамп.

“У уста одам. У кўп кишиларни алдади. Буш, Клинтон, Обама, Байденни, лекин мени алдолмади”, дея қўшимча қилган Америка президенти.

Оқ уй раҳбарининг айтишича, унга Украина бўйича келишув аллақачон бир неча бор тузилгандек туюлган.
“Менга шундай туюлдики, биз Украина бўйича тўрт марта келишувга эришдик, энди эса уни тузиш ҳақида гапиришда давом этмоқдамиз”, деди у.
АҚШ президенти Россиянинг тинч ҳамкорлик учун салоҳиятини алоҳида таъкидлаган.

“Биласизми, агар улар ўз ресурсларини уруш учун эмас, балки бошқа мақсадларда ишлатса, унинг мамлакати савдо ва бошқа соҳалар учун ажойиб имкониятларга эга. Унинг салоҳияти жуда катта. Мен шундай деган бўлардим”, дейди Оқ уй раҳбари.

Украинадаги вазият кескинлашганда қанчалик узоққа боришга тайёрлиги ҳақидаги саволга АҚШ президенти “Менга бундай саволларни берманг”, дея жавоб берган. Шу билан бирга, у можарони ҳал қилишга тайёрлигини таъкидлаган.

НАТО бош котиби Марк Рютте Трампнинг баёнотларини қўллаб-қувватлаб, уларни “Украина учун ажойиб янгилик” деб атаган.

“Агар мен Владимир Путиннинг ўрнида бўлганимда ва сиз кейинги 50 кун ичида нималарни режалаштираётганингизни эшитганимда, Украина билан музокаралар столига ўтириш керакми, деб ўйлардим”, деди Рютте.
АҚШ сенаторлари 13-июл куни президент Доналд Трампга Россияга қарши кескин санкциялар киритиш тўғрисида таклиф берди. Унда Москвага ёрдам берадиган давлатларга 500 фоизлик бож солиш назарда тутилмоқда.