АҚШ Эрон билан зиддият фонида Қатардаги авиабазани ишга туширди

АҚШ ҳарбийлари ва мамлакатнинг минтақавий ҳамкорлари интеграциялашган ҳаво ва ракетага қарши мудофаа тизимини кучайтириш мақсадида Қатарда янги операцион марказ очди. Бу ҳақда АҚШ Марказий қўмондонлиги (CENTCOM) 13 январь куни Эронда давом этаётган кескинлик фонида маълум қилди. Бу ҳақда Fox News хабар берди.
Ал Удейд базаси: минтақадаги энг йирик ҳарбий объект
Янги марказ Доҳа яқинидаги Ал Удейд авиабазасида иш бошлади. Мазкур база 10 000 нафар америкалик ҳарбийга мезбонлик қилади ва АҚШнинг Яқин Шарқдаги энг йирик ҳарбий иншооти ҳисобланади. Шунингдек, у Ироқ ва Суриядаги ИШИДга қарши кураш миссияси учун асосий логистика маркази бўлиб хизмат қилади.
Қайд этиш жоизки, айнан шу база 2025 йилнинг июнь ойида, АҚШнинг Эрон ядровий объектларига берган зарбаларига жавобан Теҳрон томонидан ҳужумга учраганди. CENTCOM қўмондони адмирал Бред Купернинг таъкидлашича, ушбу марказ минтақавий мудофаа соҳасидаги муҳим қадамдир.

“Ушбу марказ Яқин Шарқдаги минтақавий кучларнинг ҳаво ва ракетага қарши мудофаа соҳасида мувофиқлаштириш ва ўзаро маълумот алмашиш жараёнини яхшилайди”, дейилади адмирал баёнотида.

Яқин Шарқ ҳаво мудофааси бўйича Бирлашган операциялар маркази (CАОC) таркибига кирувчи ушбу янги тузилмада АҚШ ва унинг минтақавий ҳамкорлари вакиллари фаолият юритади. Маълумот учун, 20 йилдан ортиқ вақт аввал ташкил этилган CАОC ҳозирда 17 давлат вакилларини ўз ичига олган бўлиб, улар бутун минтақа бўйлаб ҳарбий ҳаво активларидан фойдаланишни мувофиқлаштиради.
Янги бўлим қуйидаги вазифалар билан шуғулланади:

кўп миллатли ҳарбий машқларни режалаштириш;
фавқулодда вазиятларга жавоб бериш;
таҳдидлар ҳақида огоҳлантириш ва разведка маълумотларини алмашиш.

Эрон ҳужуми ва Трамп муносабати
Ўтган 2025 йилда АҚШ мудофаа расмийлари Эрон Ал Удейд базасига ҳужум қилишда қисқа ва ўрта масофали баллистик ракеталардан фойдаланганини маълум қилган эди. Президент Дональд Трамп ўша пайтда ўзининг Truth Social тармоғида шундай ёзган эди:

“Эрон уларнинг ядровий иншоотларини йўқ қилганимизга жавобан кучли бўлмаган жавоб қайтарди. Биз буни кутган эдик ва самарали қайтардик. Жами 14 та ракета учирилди — 13 таси уриб туширилди, биттаси эса хавф туғдирмайдиган йўналишда бўлгани учун ‘қўйиб юборилди’”.