Ғарбликлар Учинчи жаҳон уруши бошланишига ишонмоқда – ОАВ

Ғарб мамлакатларида яшовчилар Учинчи жаҳон урушининг бошланиш эҳтимоли юқори эканига ишонмоқда. Бу ҳақда Public First компаниясининг сўнгги тадқиқотига таяниб, “Politico” нашри хабар берди.

Сўровга кўра, АҚШ, Канада, Франция ва Буюк Британия аҳолиси орасида кейинги беш йил ичида Учинчи жаҳон уруши бошланиши мумкин, деган фикр кенг тарқалган. Айниқса АҚШ (46 фоиз) ва Буюк Британияда (43 фоиз) хавотир юқори. Германия аҳолиси эса яқин йилларда глобал уруш эҳтимолига нисбатан анча шубҳа билан қарамоқда.
Тадқиқот 6–9 февраль кунлари онлайн тарзда ўтказилган бўлиб, унда жами 10 289 киши, ҳар бир мамлакатдан камида 2 минг респондент иштирок этган. Public First жамоатчилик фикри бўлими раҳбари Себ Райднинг айтишича, бир йил ичида Ғарб жамоатчилиги фикрининг кескин ўзгариши дунё хавфсизлигининг беқарорлашганини акс эттиради.

Буюк Британияда 2025 йилнинг март ойида 30 фоиз респондент янги жаҳон урушини эҳтимолли деб ҳисоблаган бўлса, ҳозир бу кўрсаткич 43 фоизга етган. АҚШда эса бу рақам 38 фоиздан 46 фоизга ошган. Шунингдек, АҚШ, Буюк Британия, Франция ва Канададаги респондентларнинг камида учдан бир қисми яқин беш йил ичида урушда ядровий қурол қўлланиши эҳтимолини “эҳтимолли” ёки “жуда эҳтимолли” деб баҳолаган.

Хавотирлар Россия–Украина можароси, шунингдек АҚШнинг Президент Дональд Трамп давридаги Эрон, Сурия, Венесуэла ва Африкадаги ҳарбий ҳаракатлари билан боғланмоқда. Сўров натижаларига кўра, Европада Россия тинчлик учун асосий таҳдид сифатида кўрилади. Канадаликлар эса энг катта хавфни АҚШдан деб ҳисоблайди. Франция, Германия ва Буюк Британияда АҚШ иккинчи, Хитой эса учинчи таҳдид сифатида қайд этилган.

Франция, Германия, Буюк Британия ва Канадада сайловчиларнинг аксарияти мудофаа харажатларини ошириш керак деб ҳисоблайди.

Европа Иттифоқининг ягона қўмондонлик остидаги доимий армиясини тузиш ғояси ҳам кенг қўллаб-қувватланмаган: Германияда 22 фоиз, Францияда 17 фоиз респондент бу ташаббусни маъқуллаган. Мажбурий ҳарбий хизмат эса энг кўп Германия ва Францияда қўллаб-қувватланган – респондентларнинг қарийб ярми бу фикрни ёқлаган.