Хоразмда экологик тунги рейдлар: Бир кечада бир нечта қоидабузарлик аниқланди

Хоразм вилояти Экология ва иқлим ўзгариши бош бошқармаси ҳамда унинг туман бўлимлари, шунингдек, Экополиция ходимлари ҳамкорлигида ҳудудларда экологик барқарорликни таъминлаш, қонунбузарликларнинг олдини олиш ва атроф-муҳитни муҳофаза қилиш мақсадида тизимли равишда тунги рейд тадбирлари ўтказилмоқда.

Ўтказилган навбатдаги назорат тадбирлари давомида вилоятнинг бир нечта туманларида атроф-муҳитга зарар етказиш ва белгиланмаган жойларга чиқинди ташлаш билан боғлиқ ҳолатлар фош этилди.

Шовот ва Урганч туманларида чиқиндиларни ноқонуний жойга ташлаш ҳолатлари

Тунги рейдлар давомида Шовот ва Урганч туманларида фуқаролар томонидан чиқиндиларни махсус белгиланмаган жойларга ташлаш билан боғлиқ иккита ҳолат аниқланди:

 Шовот тумани: Бошқарманинг туман бўлими томонидан ўтказилган тадбирда “Мевазор” маҳалласида яшовчи фуқаро Ж.А. чиқиндиларни ноқонуний жойга ташлаётган вақтида тўхтатиб қолинди.
 Урганч тумани: Экополиция Урганч туман бўлими ходимлари томонидан “Олимжон” маҳалласида ўтказилган назоратда фуқаро И.М. томонидан ҳам худди шундай қоидабузарликка йўл қўйилгани аниқланди.
​Ҳар икки ҳолат юзасидан қоидабузар фуқароларга нисбатан Ўзбекистон Республикаси Маъмурий жавобгарлик тўғрисидаги кодексининг 91-моддаси 1¹-қисмига асосан баённомалар расмийлаштирилиб, жарима жазоси қўлланилди.
Гурланда ҳавони ифлослантирган фуқаро жавобгарликка тортилди

Атмосфера ҳавосини муҳофаза қилиш йўналишида Гурлан туманида ўтказилган тунги рейд ҳам самарали бўлди. Бошқарманинг Гурлан туман бўлими ходимлари туманнинг “Шанғи” маҳалласи ҳудудида экологик меъёрларга амал қилмаган яна бир фуқарони аниқлашди.

Фуқаро А.С. ўсимлик қолдиқларини бир жойга тўплаб, очиқ аланга ёрдамида ёққанлиги назоратчилар томонидан қайд этилди. Ушбу ҳолат бўйича фуқарога нисбатан Маъмурий жавобгарлик тўғрисидаги кодексининг 88-моддаси 3-қисмига асосан маъмурий баённома расмийлаштирилди ва белгиланган тартибда жарима қўлланилди.