ХОРАЗМДА ЧОЙХОНАДАГИ ҚОНЛИ ТУН: Онасига кечқурун қўнғироқ қилингани учун бошланган жанжал қотиллик билан тугади

Хонқа туманида бир оғиз гап иккинчисига, иккинчиси эса пичоққа уланиб кетди. Бир инсон ҳаётдан кўз юмди, 21 ёшли йигит эса умрининг энг гуллаган 16 йилини панжара ортида ўтказади.

ҲАММАСИ БИТТА ҚЎНҒИРОҚДАН БОШЛАНДИ

9 апрель оқшоми, соат 21:00 атрофи. М.П. исмли эркак синфдоши Н.га қўнғироқ қилиб, синфдош қизларни йиғиб, чойхонадаги зиёфатга келишни таклиф қилади. Бу суҳбатни эшитиб қолган ўғил – И.Қ. ўзини тутолмайди. У онасининг қўлидан телефонни олиб, кечки пайт бировнинг онасини нега безовта қилаётганини сўрайди.

Жавоб кутилганидек бўлмайди. Суддаги кўрсатувга кўра, гап тортишувга айланиб, М.П. йигитни ва унинг ота-онасини ҳақорат қилишга ўтган.

БИРИНЧИ ТЎҚНАШУВ: БЎҒИШ, ТОШ ВА ТЕПКИ

И.Қ. отаси билан бирга чойхонага етиб боради. Ташқарига М.П. ва унинг уч синфдоши чиқади. Йигит таниши Ш. билан гаплашиб турганида М.П. орқадан келиб, унинг бўйнидан бўғади. Иккаласи ерга қулайди.

Отасига ҳам ташланишаётганини кўрган И.Қ. уни машинага ўтқазиб, жойдан узоқлашади. Ортидан эса тош ёғилади – тўрт улфат машинага тош отиб, эшикларини тепишади.

Аммо бу ҳали якун эмасди.

ҚАРЗГА ОЛИНГАН ПИЧОҚ

И.Қ. отасини уйда қолдириб, яна чойхона томон йўл олади. Соат 22:00 атрофида маҳалладаги дўкондан қарзга ошхона пичоғини сотиб олади ва чойхонага қайтади. М.П.га қўнғироқ қилиб, ташқарига чиқишини талаб қилади.

Синфдошлар кўчага бирга чиқишади. Шу пайт ўртага М.Х. тушади – у жанжални тўхтатиб, икки томонни ажратмоқчи бўлади. И.Қ. эса гапи фақат М.П. билан эканини, ундан аввалги қўполлиги учун узр сўраши кераклигини айтиб, М.Х.дан йўлдан четга чиқишни сўрайди.

ҲАЛОКАТЛИ ЗАРБА

Судланувчининг сўзларига кўра, М.Х. четга чиқмаган, аксинча, уни ва ота-онасини ҳақоратлай бошлаган. Ғазабини жиловлай олмаган И.Қ. қўлидаги пичоқни унинг кўкрагига санчади.

М.Х. воқеа жойидаёқ жон беради.

Шу билан ҳам тўхтамаган И.Қ. энди М.П.га ташланади ва унинг бошига пичоқ билан зарба беради. Бироқ М.П.нинг омади чопади – пичоқнинг тиғи синиб кетади ва у енгил тан жароҳати билан тирик қолади.

"ЎЛДИРИШ НИЯТИМ ЙЎҚ ЭДИ"

Судда И.Қ. пичоқни фақат ўзини ҳимоя қилиш учун олганини, ҳеч кимни ўлдириш нияти бўлмаганини, ҳаммаси кучли руҳий ҳаяжон таъсирида содир бўлганини айтди.

ҲУКМ: 16 ЙИЛ

Боғот туманидаги жиноят ишлари бўйича суд И.Қ.ни Жиноят кодексининг 97-моддаси 2-қисми "г" банди ҳамда 25, 97-моддаси 2-қисми "а" банди билан айбдор деб топди. ЖКнинг 59-моддасига асосан жазолар қисман қўшилиб, унга узил-кесил 16 йил озодликдан маҳрум қилиш жазоси тайинланди.

Битта қўнғироқ. Битта пичоқ. Бир инсоннинг ҳаёти ва бошқасининг келажаги.