НАВБАТЧИЛИКДАГИ «ГЎЗАЛЛАРНИНГ ГЎЗАЛИ»: ЯНГИАРИҚЛИК ШИФОКОР ҲАМШИРАГА ЁЗГАН SMS'И УЧУН ПАНЖАРА ОРТИГА ТУШДИ

Беморларга шифо улашиши керак бўлган оқ халатли мутахассис ўз ҳамкасбининг оиласига нотинчлик олиб кирди. Хоразм вилояти Янгиариқ тумани тиббиёт бирлашмасида ишловчи шифокор бирга ишлайдиган ҳамширага шаҳвоний мазмундаги хабарлар юборгани учун 3 суткага қамалди.

2026 йил 23 сентябрь. Шифокор навбатчиликда. Соат 18:35 атрофида қабул бўлимида ишлайдиган ҳамширанинг телефонига нотаниш рақамдан кетма-кет хабарлар кела бошлайди. «Гўзалларнинг гўзали…», «Мен сизни олдиндан яхши кўрардим» — хабарлар мазмуни шундай.

Ҳамшира хабарларни ўқигач, ҳеч иккиланмай турмуш ўртоғига кўрсатади ва рақам кимга тегишли эканини сўрайди. Эр-хотин рақам эгасини танимагач, 102 рақамига қўнғироқ қилиб, ёрдам сўраб мурожаат қилишади. Эр эса жимгина ўтириб қолмай, рақам эгасини аниқлаш учун SMS орқали жавоб қайтаради. Нариги томондаги «ошиқ» ўзини «Д.» деб таништиради.

Сирли ёзишмалар ортидан ҳамкасб шифокор чиқиб келди.

Жабрланувчи ушбу хабарлар сабаб оиласида жиддий жанжал келиб чиққанини маълум қилган. Аёл шифокорни кечирмаслигини ва унга нисбатан қонуний чора кўрилишини талаб қилган.

Иш Жиноят ишлари бўйича Янгиариқ туман судида кўриб чиқилди. Суд шифокорни Маъмурий жавобгарлик тўғрисидаги кодекснинг 41¹-моддаси 1-қисми (шаҳвоний шилқимлик қилиш) билан айбдор деб топди ва унга 3 сутка маъмурий қамоқ жазосини тайинлади.

ЭЪТИБОР БЕРИНГ

Шаҳвоний шилқимлик — бу «ҳазил» ёки «оддий хабар» эмас, қонун билан жазоланадиган ҳуқуқбузарлик. Иш жойида, телефон ёки ижтимоий тармоқлар орқали бўлсин — бундай хатти-ҳаракатга дуч келган ҳар бир инсон сукут сақламасдан ҳуқуқни муҳофаза қилувчи органларга мурожаат қилиши мумкин.

Янгиариқдаги ушбу ҳолат яна бир бор исботлади: бир неча қатор «ширин» сўз инсонни навбатчилик хонасидан тўғри қамоқхонага олиб бориши мумкин.

#Хоразм #Янгиариқ #шилқимлик #суд #хоразмбугун