Урганчда қалбаки акциз маркали алкоголь ва тамаки маҳсулотлари аниқланди

Бош прокуратура ҳузуридаги Иқтисодий жиноятларга қарши курашиш департаменти ходимлари томонидан ўтказилган тезкор тадбирларда қалбаки акциз маркали алкоголь ва тамаки маҳсулотларини муомалага чиқариш ҳолатларига чек қўйилди.

Маълум қилинишича, департаментнинг Урганч шаҳри бўлими ходимлари томонидан ўтказилган тезкор тадбир давомида “X.S.” МЧЖ масъул шахслари Урганч шаҳридаги “Ашхобод” МФЙ ҳудудида жойлашган савдо дўконида қалбаки акциз маркали маҳсулотларни сотувга қўйгани аниқланган.

Текширув жараёнида дўкондан 1 184 дона алкоголь маҳсулоти ҳамда 290 қути тамаки маҳсулотлари топилиб, улар ашёвий далил сифатида олиб қўйилган.

Шунингдек, департаментнинг Бухоро вилояти бошқармаси ходимлари томонидан ўтказилган алоҳида тезкор тадбирда ҳам шунга ўхшаш ҳолат фош этилди. Унда “J.D.” МЧЖ масъул шахслари Ғиждувон туманидаги савдо дўконида умумий қиймати 51,6 миллион сўм бўлган 1 201 дона қалбаки акциз маркали алкоголь маҳсулотларини сотувга қўйгани аниқланган.

Ҳар икки ҳолат юзасидан Ўзбекистон Республикаси Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) билан жиноят ишлари қўзғатилиб, ҳозирда тергов ҳаракатлари олиб борилмоқда.


Фуқароларга мурожаат

Иқтисодий жиноятларга қарши курашиш департаменти фуқаролар ва тадбиркорларни қонунга зид равишда этил спирти, алкоголь ва тамаки маҳсулотларини муомалага киритиш, шунингдек қалбаки алкоголь ишлаб чиқариш ҳолатларига дуч келган тақдирда бу ҳақида хабар беришга чақирди.

Бундай ҳолатлар ҳақида 71-233-10-07 рақамли ишонч телефони орқали маълум қилиш мумкин.

Мурожаат қилган шахсларнинг маълумотлари сир сақланиши кафолатланади.