Ispaniya chempionati – La Liga Kilian Mbappe bilan bog'liq mojaro sababli Xitoy bozorida 400 million yevrogacha zarar ko'rishi mumkin. Bu haqda “Vozpopuli” nashri xabar berdi.

Mojaroga “Real Madrid” hujumchisi Mbappening intervyuda internet memi qahramonini “xitoylik diktator” deb atagani sabab bo'lgan. Mazkur memda futbolchining yuzi Xitoyning sobiq rahbari Mao Tszedun surati ustiga qo'yilgan edi.

Hodisadan so'ng Xitoy davlat telekanali – CCTV Ispaniya chempionati uchrashuvlari translyatsiyalarini to'xtatdi. Vaziyatni hal qilish va ehtimoliy moliyaviy yo'qotishlarning oldini olish maqsadida La Liga rahbariyati “Real Madrid” bilan shoshilinch muzokaralarni boshlagan.

Malumotlarga ko'ra, La Liganing Xitoy bozoridagi tijoriy faoliyati 400 million yevroga baholanadi.

Eslatib o'tamiz, avvalroq Xitoy Tashqi ishlar vazirligi Kilian Mbappening Mao Tszedun haqidagi so'zlari uchun uzr so'raganini etiborga olganligini malum qilgandi. Biroq bu holat futbolchiga nisbatan boykotning yumshatilishiga olib kelishi nomalum. https://qalampir.uz/news/mbappening-uzrini-e-tiborga-olamiz-khitoy-tiv-145357