Ҳозир Суперлига ва Пролига жамоалари бир хил ҳолатда. Чунки кубок ва чемпионат ўйинлари бир вақтда давом этяпти. Ҳа, секинлик билан ўйинлар сони кўпайиб бормоқда. Йигитларга раҳмат айтаман, бугун улар катта куч йўқотишди. Гарчи иккинчи бўлимда ташаббус "Бунёдкор" томонида бўлса-да, футболчиларим ғалаба сари ҳаракат қилди. Қувонарли жиҳати шундаки, биз уларнинг ҳужумларига ўз ҳужумларимиз билан жавоб бера олдик. Очконинг биз учун қиймати юқори. Кийим алмаштириш хонасида бизга «Хоразм» ўз тарихида илк марта «Бунёдкор»дан очко олганини айтишди. Минг километр узоқдан келган мухлисларга, барчага миннатдорлик билдираман. 

Чемпионатда ОКМК ва «Бунёдкор»га қарши ўйнадик. Бу ўйинлар орқали ҳужумда ўз устимизда ишлашимиз кераклиги кўринди. Умумий олганда бизнинг жисмоний ҳолатимиз ёмон кўринмади. Гарчи футболчиларим сўнгги дақиқаларга қадар туриб бераётган бўлса-да, биз бу планда кўпроғини истаймиз. Кўп вазиятлар яратяпмиз, бироқ улардан фойдаланиш қийин кечмоқда. Шунингдек, голга бериладиган сўнгги пас бўйича қиладиган ишларимиз жуда кўп.

«Хоразм» стадионига энг сўнгги авлод сунъий чимини ётқизишди. Стадион зўр, тайёр десак ҳам бўлади. Стадионнинг бошқа жиҳатлари бўйича муаммолар бор. Масалан, ёритиш тизими, бунинг устида иш кетмоқда. Энг катта муаммо бу - VAR. Бу бизда июнь ойида тайёр бўлади. Июнгача сабр қилишимиз керак. Унгача барча ўйинларимизни нейтрал стадионларда ўтказамиз.

Ротация қила оламиз ва қиламиз ҳам. 3 кундан кейин ўйинимиз бор. Исталган мураббий қўл остида иккита бир хил таркиб бўлишини хоҳлайди. Захирада футболчилар бор, бироқ улар ҳали тўлиқ тайёр эмас. Бугунги ўйнаган футболчиларнинг бир қанчасига кубок ўйинларида дам берамиз. Дам олган футболчиларни «Қўқон-1912»га қарши чемпионат ўйинига олиб қўямиз.

 «Хоразм» ФК янгиликлари - @xorazm_fk