“У худди поезддек уради”: Абдуқодир Ҳусанов қандай қилиб “Манчестер Сити” мухлисларининг янги қаҳрамонига айланди?

“Манчестер Сити” Англия Лига кубоги финалида “Арсенал”ни мағлуб этганидан бир неча соат ўтгач, жамоа мухлислари Лондоннинг Юстон вокзалидан Манчестерга қайтувчи поездга чиқишди. Ҳамма бир номни муҳокама қиларди. Бу ғалаба голини урган Нико O’Райлини эмас, балки мутлақо бошқа футболчи — Абдуқодир Ҳусанов эди.

“Ҳусанов нақадар кучли-я?!”, — деб қолди мухлислардан бири. “У шунчаки маҳлуқ!”, — дея жавоб берди бошқаси. “Сити” ишқибозлари ўзлари учун янги қаҳрамон топишгани кундек равшан эди. Мухлисларнинг майдонда “суяк синдирувчи” тўқнашувлардан қочмайдиган, камтарин ўзбекистонлик ҳимоячидан ҳайратланиши поезд шимолга қараб елдек учгани сайин кучайиб борди. “Ўзбеклар уни яхши кўради, у улар учун худди Гарет Бэйлдек гап”, — деди яна бир мухлис.
Шундан сўнг, 2025 йил январида бу “жавоҳир”ни “Ланс”дан топиб, 31 миллион фунт эвазига “Сити”га олиб келган скаутлар манзилларига мақтовлар ёғилди. Дарҳақиқат, 2025 йил бошидаги 180 миллион фунтлик харидлар ичида Ҳусанов энг омадли трансфер бўлиб чиқди. Бу Тҳики Бегиристайннинг клубдаги 13 йиллик фаолияти давомидаги энг ақлли битимларидан бири сифатида тарихда қолиши мумкин.

“Поэзд урганими ёки Абдуқодир?”
Ҳусанов инглиз футболи мухлислари яхши кўрадиган барча жиҳатларга эга: тезлик, тажовузкорлик (яхши маънода), куч ва иштиёқ. Унинг “Арсенал” ҳужумчиси Кай Хаверцга қарши ўйини ва Виктор Дёкерешни тўхтатиб қолгани мухлисларни ҳайратга солди.
Ўзбекистонлик футбол мухлисларининг бир гапи ҳозирда Британияда машҳур бўлиб кетган:

“Поезд урди нима-ю, Ҳусанов урди нима?!”.

Ҳатто Европа Чемпионлар Лигасида “Реал Мадрид”га қарши кечган ўйинда ҳам Ҳусанов ўзининг “реактив” тезлигини намойиш этиб, Винисиус Жуниор ва Браим Диасни ортда қолдирди. Шунингдек, у “Ливерпуль”га қарши баҳсда Салоҳ ва Экитикени буткул “ишдан чиқарди”.
Энг тезкор ҳимоячи
Тезлик — Ҳусановнинг энг катта устунлиги. SIES Football Observatory яқинда уни Чемпионлар Лигасининг энг тезкор марказий ҳимоячиси деб топди. У ҳар ўйинда ўртача 17,85 марта спринт (тезкор югуриш) амалга оширади — бу АПЛдаги марказий ҳимоячилар орасида энг юқори кўрсаткич.
Пеп Гвардиола Ҳусановнинг нафақат тезлигини, балки ўйин интеллектини ҳам юқори баҳолайди:

“Одатда футболчи жисмоний жиҳатдан кучли бўлса, ақлини ишлатишга эҳтиёж сезмайди. Абдуқодирда эса иккала жиҳат ҳам бор. Тўп билан муомаласи яхшиланиб боряпти, бу мени жуда хурсанд қилади”.

Ҳусановнинг иродасини ҳам алоҳида таъкидлаш керак. Унинг “Сити”даги ҳаёти жуда оғир бошланган эди. “Челси”га қарши дебют ўйинида у тўпга чиқишда хатога йўл қўйди ва гол ўтказиб юборилишига сабабчи бўлди.

Ўшанда Гари Невилл эфирда: “Бу йигитча учун йиғлагим келяпти”, деганди. Кейинроқ “Брайтон” билан ўйинда автогол муаллифига айлангани вазиятни янада қийинлаштирди. Лекин Абдуқодир тушкунликка тушмади. У ҳафтасига 4 соат инглиз тилини ўрганди ва ўз устида ишлади.
Гвардиола у ҳақда шундай дейди:

“У Шекспир каби гапирмаса ҳам, борган сари яхшироқ мулоқат қилмоқда. У жуда ақлли. ‘Манчестер Сити’ кўп йиллар давомида ишонадиган ҳимоячисига эга бўлди”.

“Компас каби йўл кўрсатувчи”
Ҳозирда “Сити” ҳимоя марказида Рубен Диас, Марк Гехи ва Йошко Гвардиол каби юлдузлар бор. Ҳусанов асосий таркибда ўз ўрнини мустаҳкамлаб олиш учун улар билан рақобат қилмоқда.
Ҳусановнинг камтарлиги ҳаммани лол қолдиради. У стадионга бошқа юлдуз футболчилар каби қимматбаҳо бренд сумкачаларни кўтариб, дабдаба билан кирмайди — унинг бутун фикри фақат футболда. “Ланс” собиқ мураббийи Франк Ҳезе уни 19 ёшида кўрганида, ўзини худди 25 ёшли тажрибали футболчидек тутишидан ҳайратланганини айтган эди.