Ўзбекистонда исломий банк фаолиятини жорий қилишга қаратилган қонун лойиҳаси қабул қилинди

Олий Мажлис қонунчилик палатаси депутатлари 11 ноябрь куни исломий банк фаолиятини жорий қилишга қаратилган қонун лойиҳасини қабул қилиб, Сенатга юборди.
Қонун лойиҳаси исломий банк фаолиятини йўлга қўйишга қаратилган

Ушбу қонун лойиҳаси президентнинг 2023 йил 5 сентябрдаги қарори ҳамда 2024 йил 30 августдаги фармони ижросини таъминлаш мақсадида хорижий ва маҳаллий экспертлар кўмагида ишлаб чиқилган. Қонун лойиҳаси билан Солиқ кодекси, Фуқаролик кодексига ҳамда саккизта қонунга исломий банк фаолиятини амалга оширишнинг ҳуқуқий асосларини белгиловчи қўшимча ва ўзгартиришлар киритилмоқда. Қонун лойиҳасида исломий банк фаолиятини амалга ошириш ҳуқуқини берувчи лицензияни жорий қилиш назарда тутилиб, мазкур лицензияни олиш бўйича аниқ талаблар белгиланмоқда. Мазкур лицензия билан тўлақонли исломий банк ҳам, анъанавий банкда исломий дарча ҳам ташкил қилса бўлади. Банклар томонидан амалга ошириладиган исломий молия операциялари, жумладан, муробаҳа, музороба, мушарака, вакалла, салам каби операцияларнинг асосий жиҳатлари белгиланмоқда.

Қонун лойиҳасининг аҳамияти

Депутатларнинг таъкидлашича, қонун лойиҳаси билан исломий молия операцияларига солиқ солиш бўйича тегишли тартибнинг жорий қилинаётгани молиялаштиришга оид хизматлар кўламининг ошишига катта туртки беради. Мазкур қонун лойиҳасининг қабул қилиниши мамлакатда исломий банк хизматларини босқичма-босқич жорий этишга, яширин иқтисодиёт улушини камайтиришга ҳамда хорижий инвестицияларни жалб қилишга хизмат қилади.

Ўзбекистонда исломий банк ва молия инфратузилмасини яратиш режалари
Бу ҳақда мамлакатда 2018 йилдан бери айтиб келинади. 2023 йилнинг июнь ойида Тошкент шаҳрида ўтказилган халқаро форумда Apex банк бошқаруви раиси Баҳром Нўмонов: “Ўзбекистон аҳолисининг 20 фоизи диний сабаб билан анъанавий кредит тизимидан фойдаланмайди”, деб айтганди.
“Ўзбекистон-2030” стратегиясида республикада ислом молияси қонуний асосларини шакллантириш ҳамда тартибларини жорий этиш белгиланган. Мамлакатда ислом молияси жорий этилиши натижасида қарийб 10 миллиард долларлик инвестициялар жалб қилиниши, 100 мингдан ортиқ янги иш ўринлари яратилиши мумкин.
2024 йил декабрида Ўзбекистон Марказий банки Исломий молиявий хизматлар кенгашига аъзо бўлганди. Мазкур ташкилотга аъзолик бошқа мамлакатлар тажрибасини ўрганиш ва Ўзбекистонда исломий молия институтлари фаолиятини тартибга солиш ва назорат қилиш соҳасида илғор халқаро тажрибани жорий этиш имконини беради.