Apple хотира чиплари ва тезкор хотира нархининг кескин кўтарилишини қоплаш учун ўз маҳсулотлари нархини оширади. Бу ҳақда компания бош ижрочи директори Тим Кук “The Wall Street Journal” (WSJ) газетасига берган интервьюсида маълум қилди.

“Афсуски, нархларнинг ошиши муқаррар. Биз зиммамизга тушган улкан харажатлар ўсишини юмшатиш учун қўлимиздан келган барча ишни қиляпмиз ва мижозларимизни ушбу нарх ўсишидан ҳимоя қилишга ҳаракат қиляпмиз, бироқ вазият барқарорликни йўқотди”, дейди у.

Шу билан бирга, компания раҳбари бўлажак нарх ошиши айнан қайси маҳсулотларга тегишли бўлиши ва уни қачон кутиш кераклигига аниқлик киритмаган.

Кукнинг айтишича, хотира ва маълумотларни сақлаш қурилмалари, хусусан, сунъий интеллект (СИ) серверлари учун ҳам ишлатиладиган DRAM (динамик тезкор хотира) нархлари компания учун муаммога айланмоқда.

“Истеъмолчилар қурилмаларни хоҳлаётган бир пайтда таклиф камайиб бормоқда, хотира ишлаб чиқарувчилари эса баланд нархларни истеъмолчилар зиммасига юкламоқда. Истеъмол моллари учун хотира нархлари ва таклифи оқилона даражага қайтиши бизга жуда зарур. Энг асосийси шу”, дейди Apple раҳбари.

Маълумот учун, жорий йилнинг 8 июнь куни компания ўзининг янгиланган, сезиларли даражада ақллироқ ва қайта ишланган Siri СИ-ассистентига эга бўлган янги iOS 27 операцион тизимини тақдим этди. iOS 27 янгиланиши 11-сериядан бошлаб iPhone эгалари, шунингдек, Apple’нинг бошқа қурилмалари фойдаланувчилари учун очиқ бўлади. Бунда янги Siri AI ёрдамчиси iPhone 16 ва ундан янгироқ моделларда, iPhone 15 Pro, A17 Pro чипли iPad mini, M1 ва ундан янгироқ чипли iPad, M1 ва ундан янгироқ чипли Mac, Apple Vision Pro, шунингдек, мос келадиган iPhone’га уланганда Apple Watch Series 10 ва ундан янгироқ моделларда ишлайди.

Ўша куни Apple’нинг дастурий таъминотни ишлаб чиқиш бўйича катта вице-президенти Крейг Федериги баъзи компаниялар ушбу технологиялардан фойдаланадиган одамларга эътибор қаратмасдан, СИ соҳасида “прогресс ортидан қувишаётганини” айтди.

Эслатиб ўтамиз, аввалроқ 2026 йил 1 сентябрдан Apple компаниясининг янги бош директори этиб Жон Тернус тайинланиши ҳақида хабар берилган эди.