Абрамович “ўртакашлик” қилмоқчи бўлди – Зеленский

Украинa Президенти Владимир Зеленский россиялик миллиардер Роман Абрамович Киевга келиб, у билан учрашганини ва тинчлик истиқболлари бўйича Кремлга хабар етказишни таклиф қилганини маълум қилди. У бу ҳақда “Sky News” каналига берган интервьюсида айтган.

Бу Зеленскийнинг Абрамовични Украина пойтахтига ташриф буюргани ва маълум даражада музокаралар жараёнида иштирок этганини биринчи марта расман тасдиқлаши бўлган. Шу билан бирга, Украина ҳукумати раҳбари Донбасс минтақасидан воз кечмаслигини яна бир бор таъкидлаган.

“У Киевга келди. У менга: “Мен сиз билан тўғридан-тўғри мулоқот қилмоқчиман. Сиздан хабар олиб, уни Владимир Путинга етказмоқчиман”, деди. Аммо у бу жараён ҳар қандай оммавий баёнотларсиз, жимликда амалга оширилиши кераклигини айтди”, деган Зеленский.

Украина Президентининг таъкидлашича, мазкур учрашув махфий бўлмаган. Унинг сўзларига кўра, Россия томони Киев нималарга тайёр эканини билишни истаган.

“Мен унга масала бизда эмаслигини айтдим. Сиз бизнинг ҳудудимизда бизга қарши уруш олиб бормоқдасиз. Мен унга Донбасс ҳақида гапирдим ва бу асосий хабар эди. “Биз ўз ҳудудимиздан чиқиб кетмаймиз. Йўқ, биз сизга бундай йўл билан ғалабани бермаймиз. Сиз бундай ғалабага эриша олмайсиз”, дедим мен унга”, деб айтган Зеленский.

Россия Президенти Владимир Путин бир неча бор Москва, Киев Донбассдан воз кечмагунча жанговар ҳаракатларни тўхтатишга тайёр эмаслигини билдирган. Донбасс – Донецк ва Луганск вилоятларини ўз ичига олади. Ҳозирда Украина кучлари Донецк вилояти ҳудудининг тахминан бешдан бир қисми устидан назоратни сақлаб турибди. Зеленский эса аввал ҳам, ҳозир ҳам бу ҳудудлар ва у ерда яшовчи ўн минглаб украиналиклардан воз кечмаслигини таъкидлаб келмоқда.

Украина Президенти интервью давомида Россия ёки Беларусь ҳудудида Путин билан учрашиш эҳтимолини ҳам яна бир бор рад этган. Шу билан бирга, у музокараларни бошлашнинг энг тез йўли сифатида фронт чизиғидаги мавжуд ҳолат бўйича ўт очишни тўхтатишни қўллаб-қувватлашини билдирган. Бироқ бу ҳудудлардан воз кечишни англатмаслигини қайд этган.

“Ҳа, бу энг тез йўл. Аммо биз урушни шундай тарзда тугатишни истаймизки, кейин у яна қайтиб келмасин. Масала фақат жанговар ҳаракатларни музлатиб қўйишда эмас. Энг тез йўл – уларни тўхтатиш ва жараённи дипломатик майдонга ўтказишдир”, деган Зеленский.