Афсонавий футболчи Дэвид Бекхэм 2026 йилги Жаҳон чемпионати старт олган кунда Голливуднинг Шон-шараф хиёбонида ўз юлдузига эга бўлди. Бу ҳақда “The Guardian” нашри хабар берди.

Дэвид Бекхэм ушбу мукофотни “ҳаётимдаги энг ғайриоддий воқеалардан бири”, деб атаган. Том Круз эса унинг фаолиятини “меҳнат, қатъият ва спорт ҳамда маданиятга глобал таъсир ҳақидаги Голливуд ҳикояси”, дея таърифлаган.

Маросим анъанавий қизил йўлак ўрнига яшил футбол майдони услубидаги йўлакда ўтказилиб, 2026 йилги футбол бўйича Жаҳон чемпионати шарафига ташкил этилган.

“Мен доим орзу қилувчи инсон бўлганман, аммо бундай шараф оддий инглиз футболчисига насиб этишини ҳатто тасаввур ҳам қилмаганман”, дейди Бекхэм.

Унинг айтишича, бу воқеа АҚШда 2026 йилги Жаҳон чемпионати очилиши арафасида юз бергани алоҳида рамзий аҳамиятга эга.

“Сўнгги ўттиз йил ичида мен севган спорт турининг бу мамлакатда қанчалик ривожланганини кўриш жуда муҳим лаҳзадир”, дейди у.

2007 йилдан бошлаб олти мавсум давомида “Лос Анжелес Галакси” сафида ўйнаган ва ҳозирда “Интер Майами” клубининг ҳаммуассиси ҳисобланган Бекхэм Том Крузга мурожаат қилиб, “Замонамизнинг энг буюк кино юлдузи бўлган дўстим Том Круз қаршисида туриш ҳақиқатан ҳам ҳайратланарли”, деган.

“Сиз бизни 20 йил аввал Лос-Анжелесда кутиб олган эдингиз ва ўшандан бери мен учун садоқатли дўст ҳамда илҳом манбаи бўлиб келяпсиз”, дея қўшимча қилган у.

Кейинроқ Бекхэм ва Том Круз бошқа машҳур шахслар билан бирга Лос-Анжелес стадионида бўлиб ўтган Жаҳон чемпионатининг очилиш маросимида иштирок этган. АҚШ терма жамоаси Парагвайни 4:1 ҳисобида мағлуб этган ўйиндан олдин Голливуд услубидаги шоу намойиш қилинган.

Маросимда Леонардо ДиКаприо, Ҳэлли Берри, Роб Лоу, Оуэн Уильсон ва Пэрис Хилтон каби машҳурлар ҳам қатнашган. АҚШ Президенти Дональд Трамп эса маросимда иштирок этмаган.

Эслатиб ўтамиз, аввалроқ футбол бўйича Жаҳон чемпионати расман старт олгани ҳақида хабар берилган эди.