Стэнфорд университетидаги битирув маросимида Google бош директори Сундар Пичайнинг нутқи вақтида талабаларнинг оммавий норозилик акцияси бўлиб ўтди. Бу ҳақда “News 18” нашри хабар берди.

Қайд этилишича, бугун, 15 июнь куни Стэнфорд университетининг 135-битирув маросими ўтказилган. Унда университет битирувчиси ва Google раҳбари Сундар Пичай 2026 йил битирувчиларига мурожаат қилган. Университет маълумотларига кўра, тадбирда 20 мингдан ортиқ киши, жумладан, 3 600 нафар талаба иштирок этган. Бироқ Пичай нутқ сўзлаётган вақтда тахминан 200 нафар талаба ўринларидан туриб, зални тарк этган. Қолган айрим гуруҳлар эса Фаластин байроқларини кўтариб, баннерлар намойиш қилган ва ҳуштак чалган ҳолда нутқ ўртасида чиқиб кетган.

Норозилар Google компаниясининг Исроил ҳукумати билан ҳамкорлигига қарши чиққан. Хусусан, улар 2021 йилда тузилган ва қиймати 1,2 миллиард долларга баҳоланган Project Nimbus булутли технологиялар лойиҳасини танқид қилган. Намойишчилар ушбу келишувни Исроил билан технологик ҳамкорликнинг рамзи сифатида баҳоламоқда.

Ижтимоий тармоқларда тарқалган видеоларда талабалар “Free Palestine” (“Озод Фаластин”) дея ҳайқириб, Фаластин байроқлари ва норозилик плакатлари билан залдан чиқиб кетаётгани акс этган. Маълум қилинишича, акцияни Students for Justice in Palestine ва No Tech for Apartheid каби ташкилотлар уюштирган.

Пичай ўз нутқида Ҳиндистоннинг Ченнай шаҳридан Калифорниягача бўлган ҳаёт йўли ҳақида гапириб, битирувчиларни қийинчиликларга қандай муносабат билдириш муҳимлигига чақирган.

“Баъзан кундалик янгиликларга қараб, биз ўта мураккаб даврда яшаяпмиз деб ўйлаш осон. Аммо ҳар бир авлод ўз синовларига дуч келганини эслаш фойдали. Биз қайси дунёда битираётганимизни танлай олмаймиз, лекин вазиятга қандай муносабатда бўлишимизни танлаш имкониятига эгамиз”, деган у.

Талабаларнинг норозилик акцияси университет ташқарисида ҳам муҳокамаларга сабаб бўлган. Ҳинд-америкалик венчур сармоядор ва технология соҳаси вакили Винод Хосла X ижтимоий тармоғидаги саҳифасида намойишчиларни танқид қилиб, талабаларнинг ҳаракатларини “бир томонлама, аҳмоқона, узоқни кўра билмайдиган ва жуда худбинона”, деб баҳолаган.

Эслатиб ўтамиз, аввалроқ Лондон марказида ўн минглаб одамлар икки алоҳида намойиш – Nakba Day’дан бир кун ўтиб ўтказилаётган Фаластин тарафдорлари маршини ўтказишган эди.