Жорий йилнинг 28 февралида бошланган Исроил ва АҚШнинг Эронга қарши ҳужумларида Миноб шаҳридаги қизлар бошланғич мактаби ҳам нишонга олинган эди. Кеча, 17 июнь куни АҚШ Президенти Дональд Трамп G7 саммити доирасида мактаб ўқувчиларининг ҳалок бўлишида ўз мамлакатининг жавобгарлиги тўғрисидаги саволга жавоб беришдан қочди. Бу ҳақда “Sky News” хабар берди.

Трамп матбуот анжумани чоғида ушбу факт бўйича ҳали ҳам тергов ҳаракатлари олиб борилаётганини ва ҳозирча Эрондаги мактабга берилган зарба учун кимнидир жавобгарликка тортишни режалаштирмаётганини маълум қилган.

“Йўқ. Агар бу хатолик бўлса… ва ўзингиз билганингиздек, тергов олиб борилмоқда… Бугун берилаётган бундай ғалати савол, ахир гап анча олдинги воқеалар ҳақида кетмоқда. Лекин буни ҳеч ким атайлаб қилмаган”, дейди Трамп.

Шу билан бирга, у содир бўлган воқеа АҚШ ҳарбийларининг хатоси бўлиши мумкинлигини инкор этмаган.

“Йўқ, хатолар бўлиб туради. Уруш – ифлос иш, лекин мен тергов кетаётганини биламан ва сизга ҳисоботни эртагаёқ тақдим этишим мумкин эди. Ёки мен бу саволни Пентагон раҳбари Пит Хегсетга берган бўлардим, чунки улар тергов олиб боришмоқда”, дейди Трамп.

Эслатиб ўтамиз, 28 февраль куни Эроннинг Миноб округига уюштирилган ҳужумлар чоғида қизлар бошланғич мактаби зарар кўргани ва оқибатда 175 нафар ўқувчи қиз ҳалок бўлгани маълум бўлган эди. Шундан сўнг ўқувчилар ва педагогларнинг дафн маросимлари бўлиб ўтди. Турли маълумот манбаларидан фойдаланган ҳолда 6 ёшдан 13 ёшгача бўлган барча 120 нафар ўқувчи ва 26 нафар ўқитувчининг шахси аниқланди.

Кейинчалик Эрон ТИВ расмий вакили баёнот билан чиқиб, АҚШ ва Исроилни ҳарбий жиноятларда айблади. Пентагон раҳбари Пит Хегсет Эрондаги ҳарбий операцияга бағишланган матбуот анжуманида қизлар мактабига берилган зарбалар бўйича тергов бошланганини маълум қилди.

Бу орада Дональд Трамп қизлар мактабига берилган зарба учун жавобгарликни Эроннинг ўзига юклади. “The New York Times” нашри эса давом этаётган терговга таяниб, Эрондаги мактабга қилинган ҳужум учун АҚШ жавобгар эканини хабар қилди.