Ўзбекитоннинг турли ҳудудларида Корея давлатига ишга юборишни ваъда қилиб, фуқаролардан катта миқдорда пуллар олган шахслар қўлга олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Хусусан, Фарғона вилоятидан ўтказилган терговга қадар текширувда миграция агентлигининг Фарғона вилояти филиали собиқ раҳбари Б.Х. 8 нафар фуқарони имтиҳонлардан ўтказиб, Корея давлатига ишга юбориши учун 90 000 АҚШ долларини фирибгарлик йўли билан қўлга киритганлиги аниқланган.

Бундан ташқари, Наманган вилоятининг Янгиқўрғон туманида фуқаролар С.А. ва Ш.Х. 22 нафар фуқарони Корея давлатига ишга юборишларини айтиб, 34 200 АҚШ доллари ва 79,3 млн сўмни фирибгарлик йўли билан қўлга киритганликлари аниқланган.

Жиззах вилоятида ҳам фуқаро И.А. (муқаддам судланган) 6 нафар фуқаронинг ишончига кириб, уларни Корея давлатига ишга юборишини айтиб, 32 250 АҚШ долларини фирибгарлик йўли билан қўлга киритганлиги аниқланган.

Департаментнинг Гулистон шаҳри бўлими томонидан ўтказилган терговга қадар текширувда ҳам фуқаро Х.Х. 6 нафар фуқарони Корея давлатга ишга юбориши учун 19 000 АҚШ долларини фирибгарлик йўли билан қўлга киритганлиги аниқланиб, фуқаро Ж.М.дан олган 6 000 АҚШ доллари ҳисобидан 700 минг сўмнинг қайтарилиши процессуал тартибда расмийлаштирилган.

Шунингдек, Самарқанд шаҳрида фуқаро З.М. фуқаро А.Ғ.ни Корея давлатига ишга юбориши учун 12 500 АҚШ долларини фирибгарлик йўли билан қўлга киритганлиги маълум бўлган.

Фарғона тумани бўлими томонидан ўтказилган терговга қадар текширувда фуқаро А.К. фуқаро Ж.Ж.ни миграция агентлигида ишловчи танишлари орқали Корея давлатига ишга юборишини айтиб, 10 000 АҚШ долларини фирибгарлик йўли билан қўлга киритганлиги аниқланиб, ушбу пуллар ҳисобидан 3 000 АҚШ долларининг қайтарилиши процессуал тартибда расмийлаштирилган.

Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.

Эслатиб ўтамиз, аввалроқ Тошкент ва Андижон вилоятларида фуқароларни АҚШ ҳамда Жанубий Кореяга ишга юборишни ваъда қилиб, улардан катта миқдорда пул талаб қилган шахслар қўлга олинган эди.