Эронда урушда ўзини “қурбон қилиш”га рози бўлган жуфтликлар учун оммавий тўй ўтказилди

Эроннинг Теҳрон шаҳрида 18 май куни оммавий равишда никоҳ тўйлари ташкил этилди. Унда қатнашган жуфтликлар давлат томонидан қўллаб-қувватланадиган махсус схемага аъзо бўлган. Яъни улар АҚШ ва Исроилга қарши урушда ўз жонини қурбон қилишга тайёр эканини билдирган. Бу ҳақда CBS News хабар берди.
Маҳаллий оммавий ахборот воситаларининг хабар беришича, маросимлар пойтахтнинг бир нечта йирик майдонларида бўлиб ўтган. Унда юзлаб жуфтликлар иштирок этган. Жумладан, Теҳрон марказидаги улкан “Имом Ҳусайн” майдонининг ўзида 110 дан ортиқ жуфтлик жам бўлди.

Тўй уруш давридаги халқ руҳини кўтариш мақсадида давлат телевидениеси орқали жонли эфирга узатилди. АҚШ ва Исроилнинг 28 февралдаги ялпи зарбалари билан бошланган уруш ҳозирда вақтинча тўхтаган. Бироқ бу “заиф” сулҳ шароитида АҚШ президенти Дональд Трамп Эронга қарши қайта-қайта янги ҳарбий чоралар билан таҳдид қилмоқда.

Эрон давлат матбуотига кўра, тўй эгалари “ўзини қурбон қилиш” схемасида рўйхатдан ўтган. Унга аъзо бўлганлар урушда ўз ҳаётини хавф остига қўйишга ваъда беради. Масалан, улар электр станциялари атрофида “тирик занжирлар” ҳосил қилиши кўзда тутилган.

Миллионлаб одамлар рўйхатдан ўтган
Расмийларининг маълум қилишича, миллионлаб одамлар бу схемада қатнашиш учун ариза топширган. Улар орасида мамлакатнинг юқори мартабали шахслари, жумладан, парламент спикери Муҳаммад Бағир Ғалибоф ва президент Масъуд Пезешкиён ҳам бор.

Бу тадбирлар режимнинг миллий бирлик ва урушга тайёрликни кўрсатишга қаратилган кенг кўламли кампаниясининг бир қисмидир. 18 май куни Теҳроннинг турли майдонларида чодирлар ҳам тикланди. У ерда ҳарбийлар аҳолига ўқ отиш қуролларидан фойдаланиш бўйича бошланғич сабоқларни берди.

AFP агентлиги тақдим этган тасвирларига кўра, келин-куёвлар “Имом Ҳусайн” майдонига пулемётлар ўрнатилган ҳарбий жипларда етиб келган. Никоҳ маросими саҳнада диний уламо бошчилигида ўтказилган.

Саҳна шарлар ва олий раҳнамо Можтаба Хоманаийнинг улкан сурати билан безатилган. Можтаба урушнинг биринчи кунида отаси ва ўзидан олдинги раҳнамо Оятуллоҳ Али Хоманаий ўлдирилганидан кейин бу лавозимга кўтарилган эди. У ўшандан бери ҳали жамоатчиликка кўриниш бергани йўқ.

“Тўғри, мамлакатда уруш кетмоқда, лекин ёшларнинг ҳам оила қуришга ҳаққи бор”, деди келинлик либосидаги аёл.