Марокаш суди халқаро гиёҳвандлик савдоси ва коррупцияга оид йирик иш бўйича 29 нафар шахсни, жумладан, таниқли сиёсатчилар ва спорт соҳаси вакилларини 12 йилгача озодликдан маҳрум қилиш жазосига ҳукм қилди. Бу ҳақда “Al Jazeera” хабар берди.

Маълум қилинишича, ҳукм қилинганлар орасида қурилиш соҳасидаги тадбиркор ва собиқ минтақавий кенгаш раиси Абденнеби Биюи, Касабланканинг “Видад” футбол клубининг собиқ президенти Саид Носири ҳамда парламентнинг собиқ депутати Белкасем Мир ҳам бор. Улар ҳукмрон PAM партиясининг юқори лавозимли аъзолари ҳисобланади.

Суд қарорига кўра, Биюи 12 йилга, Носири ва Мир эса 10 йилдан қамоқ жазосига ҳукм қилинган. Қолган судланувчилар эса ишдаги ролига қараб икки йилдан тўққиз йилгача озодликдан маҳрум этилган. Қайд этилишича, мазкур жиноят иши “Саҳронинг Пабло Эскобари” лақаби билан танилган малилик машҳур гиёҳванд моддалар савдогари Эл Ҳаж Аҳмад Бен Браҳимнинг судда берган кўрсатмаларидан кейин бошланган.

Ҳозирда Марокашда 10 йиллик қамоқ жазосини ўтаётган Бен Браҳим терговчиларга собиқ марокашлик сиёсий ва бизнес ҳамкорлари унинг 2019 йилда ҳибсга олинганидан сўнг миллионлаб долларлик кўчмас мулклари ва қимматбаҳо автомобилларини ўзлаштириб олганини айтган. Суд жараёнида 20 дан ортиқ айбланувчи, 18 нафар гувоҳ ва икки нафар даъвогар иштирок этган.

Тергов маълумотларига кўра, жиноий тармоқ Марокашда ишлаб чиқарилган тонна-тонналаб каннабис смоласини Шимолий Африка орқали Европага, шунингдек, Лотин Америкасидан келтирилган кокаинни ташиш билан шуғулланган. Судланувчилар гиёҳванд моддалар ва олтин контрабандаси, коррупция, ҳужжатларни сохталаштириш ҳамда пул ювиш каби жиноятларда айбдор деб топилган.

Эслатиб ўтамиз, аввалроқ Жанубий Кореянинг собиқ президенти Юн Сок Ёлнинг рафиқаси Ким Гон Хи давлат лавозимларига тайинлов эвазига пора олганликда айбдор деб топилиб, 7 йил муддатга озодликдан маҳрум этилган эди.