АҚШ Президенти Дональд Трамп шу ҳафта Туркияда бўлиб ўтадиган НАТО саммити доирасида Украина Президенти Владимир Зеленский билан учрашиб, Украинадаги урушни тугатиш бўйича янги саъй-ҳаракатларни муҳокама қилади. Бу ҳақда АҚШнинг юқори лавозимли расмийсига таяниб, “Reuters” хабар берди.

Маълум қилинишича, Трамп саммитда иштирок этиш учун 8 июль куни Туркияга етиб боради. Унинг дастлабки учрашуви мезбон давлат Президенти Ражаб Тоййиб Эрдоған билан бўлади. Шунингдек, Трамп Сурия Президенти Аҳмад аш-Шараа билан ҳам музокара ўтказади ва матбуот анжуманида қатнашади.

Исмини ошкор қилмаслик шарти билан журналистларга маълумот берган АҚШ расмийсининг айтишича, Трамп 9 июль куни Зеленский билан учрашиб, “урушни қандай тугатиш мумкинлиги”ни муҳокама қилади.

“Сўнгги икки ой ичида фронт чизиғидаги вазият деярли ўзгармади ва ҳеч бир томон сезиларли ютуққа эриша олмаяпти. Президент эса бу урушни тез фурсатда тўхтатиш зарурлигини билдирмоқда”, деган у.

Расмийнинг қўшимча қилишича, Трамп НАТОга аъзо давлатларни мудофаа харажатларини оширишга чақириш ниятида ва бу чақириқни шахсан етказади. Шунингдек, саммит давомида мудофаа соҳасига оид миллиардлаб долларлик битимлар эълон қилиниши кутилмоқда, аммо уларнинг тафсилотлари ҳозирча очиқланмаган.

Европа расмийлари Трампнинг Эрдоған ва НАТО бош котиби Марк Рютте билан яхши муносабатлари саммитнинг муваффақиятли ўтишига ёрдам беради, деб умид қилмоқда. Бироқ улар Эрон уруши ортидан юзага келган трансатлантик келишмовчиликлар ҳамда Трампнинг НАТОни тез-тез танқид қилиши сабабли маълум даражада хавотир билдирган.

Трамп, аввалроқ НАТО давлатлари АҚШга Эронга қарши АҚШ–Исроил ҳарбий амалиётида етарлича ёрдам бермаганидан норози эканини билдирган эди.

5 июль куни АҚШ Президенти Россия Президенти Владимир Путин билан 90 дақиқа давом этган телефон мулоқотини ўтказганди. Кремль ёрдамчиси Юрий Ушаковнинг маълум қилишича, суҳбат чоғида Трамп Украинадаги урушга ечим топишга кўмаклашишни таклиф қилган.

Эслатиб ўтамиз, аввалроқ 7–8 июль кунлари Туркия пойтахти Анқарада НАТОга аъзо давлатлар раҳбарларининг саммити бўлиб ўтиши ва унда АҚШ Президенти Дональд Трамп ҳам иштирок этиши хабар қилинганди.