Эрон Ислом инқилоби муҳофизлари корпуси бугун, 8 июль куни АҚШнинг Эронга берган янги зарбаларидан сўнг Баҳрайн ва Қувайтдаги АҚШ ҳарбий объектларига ракета ва дронлар билан ҳужум қилди. Бу ҳақда “Reuters” хабар берди.

Ислом инқилоби муҳофизлари корпуси Баҳрайндаги Бандар Салмон, АҚШ Бешинчи денгиз флоти жойлашган ҳудуд ҳамда Қувайтдаги Али Ал-Салем ҳаво базасига қўшма ракета ва дрон операциясини амалга оширганини, шунингдек, операцияга аралашишга уринган АҚШнинг MQ-9 дронини уриб туширганини билдирган.

Қайд этилишича, Баҳрайн ва Қувайтда ҳаво ҳужуми сиреналари янграган. Қувайт армияси ҳаво мудофаа тизимлари “душман” ракета ва дрон ҳужумларига қарши ҳаракат қилаётганини маълум қилган. АҚШ ҳарбийлари ҳозирча ҳужумлар юзасидан изоҳ бермаган.

АҚШ Марказий қўмондонлиги (CENTCOM) операция давомида Ислом инқилоби муҳофизлари корпусининг 60 дан ортиқ кичик кемаси нишонга олинганини маълум қилган. Қўмондонликка кўра, операция Эроннинг ўт очишни тўхтатиш келишувини бузиб, денгиз қатновига ҳужум қилгани учун унга оғир баҳони юклаш мақсадида ўтказилган.

“Эрон кучларининг асоссиз тажовузи ўт очишни тўхтатиш келишувининг очиқ ва хавфли бузилиши бўлиб, денгизда эркин қатновга путур етказади”, деган CENTCOM баёнотида.

Марк Рютте Анқарада ўтаётган НАТО саммити арафасида журналистларга АҚШнинг Эронга қарши янги ҳужумлари “мутлақо зарур” бўлганини айтган.

“Агар ўт очишни тўхтатиш келишуви мавжуд бўлса ва Эрон уни амалда бузган бўлса, АҚШнинг қатъий жавоб қайтариши жуда муҳим деб ҳисоблайман”, деган Рютте.

Эрон парламенти спикери Муҳаммад Боқир Ғолибаф АҚШни ўт очишни тўхтатиш келишувини бузишда айблаган. У сўнгги ҳарбий ҳужумлар, нефтьга қарши янги санкциялар, Ҳормуз бўғозидаги Эрон “тартиблари”нинг бузилиши ҳамда Исроилнинг Ливанга ҳужумларини мисол қилган.

“Босим ва товламачилик даври тугади. Биз таслим бўлмаймиз”, деб ёзган Қолибоф X ижтимоий тармоғида.

Дональд Трамп бир неча бор Эрон “келишувга эришмаса”, бомбардимонлар қайта бошланиши мумкинлигини айтган. Эрон ташқи ишлар вазири Аббос Ароқчи эса вақтинчалик меморандум шартларига кўра, “таҳдидлар давом этар экан, якуний келишув бўйича музокаралар бошланмайди”, деган.

Эслатиб ўтамиз, аввалроқ, АҚШ Ҳормуз бўғозидаги учта танкерга қилинган ҳужумларга жавобан Эронга қарши янги ҳарбий зарбалар берган ва Эронга нефть сотишга рухсат берувчи лицензияни бекор қилган эди.