Украина Президенти Владимир Зеленский Россия билан тинчлик битимини АҚШ Президенти Дональд Трамп истаган жойда, жумладан, Оқ уй ёки Флоридадаги Мар-а-Лаго қароргоҳида имзолашга тайёрлигини маълум қилди. Бу ҳақда у америкалик консерватив шарҳловчи Лаура Лумерга берган интервьюсида сўз очди.

Зеленскийнинг айтишича, асосий масала битим қаерда имзоланиши эмас, балки унга қачон эришилишидир. У Украина учун энг муҳим вазифа фуқаролар ҳаётини сақлаб қолиш эканини таъкидлаб, уруш яна ўнлаб йиллар давом этишидан кўра, уни тезроқ якунлаш афзал эканини қайд этган.

Маълум қилинишича, Киев ва Вашингтон айни пайтда урушни тугатишга қаратилган дипломатик саъй-ҳаракатларни кучайтирмоқда. Зеленский Трампнинг махсус вакиллари Стив Уиткофф ва Жаред Кушнер билан музокаралар ўтказган. Томонлар Россияга тақдим этилиши мумкин бўлган янги таклифлар, жумладан ҳаво ҳудудида ўт очишни тўхтатиш масаласини ҳам муҳокама қилган.

Шунингдек, Зеленский 2025 йил апрель ойида Ватиканда Дональд Трамп билан бўлиб ўтган шахсий учрашув уларнинг муносабатларида бурилиш нуқтаси бўлганини айтган. Унинг сўзларига кўра, ўша суҳбатдан кейин томонлар ўртасидаги таранглик камайган.

Айни вақтда Россия Ташқи ишлар вазири Сергей Лавров АҚШни 2025 йил август ойида Алясканинг Анкориж шаҳрида ўтган саммитдаги айрим мажбуриятларини бажармаганликда айбламоқда. АҚШ Давлат котиби Марко Рубио эса Анкорижда муҳокама қилинган ҳудудий таклифлар Украина томонидан рад этилгани сабабли муваффақиятсиз бўлганини ва энди тинчликка эришиш учун янги таклифлар ишлаб чиқилиши кераклигини билдирган.

Эслатиб ўтамиз, жорий йилнинг 8 июль куни Туркиянинг Анқара шаҳрида ўтган НАТО саммити доирасида Дональд Трамп ва Владимир Зеленский учрашганди. Ўшанда Трамп Украинадаги урушни тугатиш осон эмаслигини, бироқ музокараларда сезиларли силжиш борлигини айтиб, Путин ва Зеленский можарони якунлашни истаётганини билдирган эди.