Россия Бош вазири ўринбосари Александр Новак автомобиль бензини экспортига қўйилган тақиқ жорий йилнинг охиригача узайтирилганини эълон қилди. Бу ҳақда “The Moscow Times” хабар берди.

Қайд этилишича, соҳавий штаб йиғилишида қабул қилинган қарор ёқилғи ишлаб чиқарувчиларга ҳам, ишлаб чиқармайдиган компанияларга ҳам татбиқ этилади.

“Бензин экспортини тақиқлаш бўйича штабда уни ишлаб чиқарувчилар учун ҳам, ишлаб чиқармайдиганлар учун ҳам узайтириш қарорини қабул қилдик. Яъни, у йил охиригача узайтирилади”, дейди Новак.

Шу билан бирга, дизель ёқилғисига нисбатан ҳукумат бошқача ёндашувга амал қилмоқчи. Бош вазир ўринбосарининг сўзларига кўра, нефтни қайта ишлаш заводлари (НҚИЗ) ортиқча ёқилғи тўпланиб қолиши ва қайта ишлаш ҳажмининг камайиши билан боғлиқ қийинчиликларга дуч келмаслиги учун дизель экспортига қўйилган тақиқ “бозор қайта тикланишига қараб” бекор қилинади. Новак ички бозор тўлиқ тўйинтирилгандан сўнг дизель ёқилғиси экспортини қайта тиклаш Россия НҚИЗлари ишлаб чиқариш қувватларининг тўлиқ юкланишини ушлаб туриш учун ўта муҳим бўлишини таъкидлаган.

Маълумот учун, Россияда нефть маҳсулотлари экспортини чеклаш тўғрисидаги қарор босқичма-босқич қабул қилинди. Аввалроқ, жорий йил 1 апрелдан авиакеросин олиб чиқишга, 1 июндан бензинга тақиқ киритилди, 8 июлдан эса ҳукумат чекловларни дизель ёқилғиси экспортига ҳам татбиқ этди. Бунгача Новак ёқилғи бозоридаги вазиятни “мураккаб” деб баҳолаган. У бензин ишлаб чиқаришнинг вақтинчалик қисқаришига дрон ҳужумлари оқибатида бир қатор НҚИЗларнинг шикастланганини сабаб қилиб кўрсатган. Ҳукумат қарорига кўра, дастлаб дизель ёқилғиси экспортига қўйилган тақиқ 2026 йил 31 июлгача амал қилиши керак эди.

“Reuters” ҳисоб-китобларига кўра, нефтни қайта ишлаш объектларига берилган зарбалар оқибатида Россия ўз НҚИЗлари қувватининг қарийб 40 фоизини йўқотган. Июль ойининг иккинчи ҳафтасида бензин ишлаб чиқариш кунига 75–80 минг тоннагача камайган, ваҳоланки, ёзги талабнинг энг юқори нуқтасида эҳтиёж кунига 115–120 минг тоннага етади. РБК ҳисоб-китобларига кўра, жорий йилнинг июнь–июль ойларида ёқилғи сотишга тўлиқ ёки қисман чекловлар 80 та ҳудудда, жумладан, Россия ҳудудлари ва эгаллаб олинган Украина ҳудудларида жорий этилган.