Исроил босиб олган Ғарбий Cоҳилда исроиллик кўчманчиларнинг ҳужумлари ва ҳарбий рейдлар тобора кучайиб, вазият “портлаш нуқтаси”га яқинлашаётгани айтилмоқда. Бу ҳақда “Reuters” хабар берди.
Фаластинликларнинг айтишича, ўтган ҳафта Наблус жануби-ғарбидаги Тал қишлоғида юз берган тўқнашувлардан сўнг Исроил армияси ўнлаб одамларни қўлга олган ва Ғарбий Соҳилдаги йўлларни ёпган. Ҳодисада 4 нафар фаластинлик ва 2 нафар исроиллик ҳалок бўлган. Кеча, 27 июль куни эрталаб Тал, қўшни қишлоқлар ҳамда Наблусга кириш йўлларининг аксарияти қисман ёки тўлиқ ёпилгани сабабли назорат-ўтказиш пунктларида узун навбатлар юзага келган.
Жорий йилнинг 24 июль кунги ҳодиса қишлоқ аҳолиси қуролланган кўчманчилар гуруҳи уйларга киришга уринганини айтганидан кейин содир бўлган. Исроил армияси эса ўнлаб фаластинликлар ва исроиллик фуқаролар ўртасида “зўравонлик билан кечган тўқнашув” юз бергани ва ҳар икки томондан ўқ узилганини маълум қилган.
Бош вазир Биньямин Нетаньяху ҳукумати ушбу воқеани террорчилик ҳаракати сифатида баҳолаган. Фаластинликлар эса қишлоқ аҳолиси уларни ерларидан ҳайдашга қаратилган навбатдаги кўчманчилар ҳужумига қарши ўзини ҳимоя қилганини таъкидламоқда. 24 июль кунги тўқнашувда ҳалок бўлган фаластинликлардан бирининг отаси, 71 ёшли Аҳмад Рамазоннинг айтишича, қишлоқ четида жойлашган уларнинг уйи узоқ вақтдан бери кўчманчилар томонидан таҳдид ва таъқибларга учраб келган.
“Улар бизни террорист дейишади. Биз террорист эмасмиз”, деган Рамазон.
Унинг сўзларига кўра, ҳалок бўлган исроиллик кўчманчи – яқин атрофдаги Ҳават Гилад аҳоли пункти хавфсизлик координатори ва ҳарбий захирачи Бенаяҳу Меллет аввал ҳам унинг уйига келиб, оиласини Сурия ёки Иорданияга кетишга чақирган.
“Ҳатто ўлсак ҳам, шу ерда, ўз еримизда ўламиз. Бу мамлакатни тарк этиш ниятимиз йўқ”, деган Рамазон.
Унинг айтишича, агар кўчманчилар яна келса, қишлоқ аҳолиси қаршилик кўрсатишга тайёр.
Исроил расмийлари дастлаб воқеани қишлоқ яқинида сайр қилаётган исроилликларга фаластинликлар ҳужум қилгани сифатида тавсифлаган. Мазкур ҳудуд Ғарбий соҳилнинг А зонасига киради ва бу ерга исроилликларнинг кириши одатда тақиқланган.
Тал қишлоғи аҳолиси кўчманчилар биринчи бўлиб ҳужум қилганини, шундан кейин қишлоқ аҳолисидан бири улардан бирининг қуролини тортиб олганини билдирган. Маҳаллий аҳолининг сўзларига кўра, сўнгги ойларда кўчманчиларнинг фаластинликлар яшайдиган ҳудудларга келиб, уларни қўрқитиш ва таҳдид қилиш ҳолатлари кўпайган. Шу билан бирга, Нетаньяху ҳукумати вазирлари Ғарбий соҳилни аннексия қилиш ҳақида очиқ гапирмоқда.
Бирлашган Миллатлар Ташкилоти маълумотларига кўра, жорий йил бошидан буён кўчманчилар билан боғлиқ ҳодисаларда 18 нафар фаластинлик ҳалок бўлган. Бу кўрсаткич бутун 2025 йил давомида 17 нафарни ташкил этган. Фаластин миллий маъмурияти эса йил бошидан бери кўчманчилар қўлида камида 20 нафар фаластинлик ҳалок бўлганини маълум қилган.
Қишлоқ аҳолисининг айтишича, 24 июлдан бери Талда ҳар куни ҳарбий рейдлар ўтказилмоқда. 60–80 нафар атрофида одам қўлга олинган бўлиб, қишлоқ кенгаши раиси ўринбосари Мунзер Штайянинг маълум қилишича, улардан 30 нафари ҳали ҳам ҳибсда сақланмоқда.
“Ҳозир бутун ҳарбийлар кўчаларда”, деган Тал қишлоғи аҳолиси вакили Камол Штайя.
Октябрь ойида бўлиб ўтадиган сайловлар арафасида Нетаньяху ҳукумати Ғарбий Соҳилда янги аҳоли пунктлари қурилишини янада фаол маъқулламоқда. Ҳукумат вакиллари буни Исроил назоратини мустаҳкамлаш чораси сифатида изоҳламоқда.
БМТ, Фаластин томони ва аксарият давлатлар мазкур аҳоли пунктларини халқаро ҳуқуққа зид деб ҳисоблайди. Исроил эса Ғарбий соҳил баҳсли ҳудуд экани ва мамлакатнинг бу ер билан тарихий боғлиқлиги борлигини таъкидлаб келади. 72 ёшли фермер Аҳмад Штайянинг айтишича, сабрнинг ҳам чегараси бор.
“Ҳар қандай инсон ўзини ҳимоя қилади”, деган у журналистларга.
Помидор, анжир ва бақлажон етиштирувчи фермернинг сўзларига кўра, кўчманчилар унга даласида ишлаётганида ҳам яқинлашиб, бу ер Исроилники эканини айтишади.
