Кеча, 1 август куни Москванинг Кудринская майдонида портлаш содир бўлди. Бу ҳақдаги маълумотни Москва бўйича ИИВ Бош бошқармаси тасдиқлади. 

“Baza”нинг аниқлик киритишича, портлаш Сталин даврига оид баланд қаватли бинонинг биринчи қаватида жойлашган “Balzi Rossi” ресторанида юз берган. Ресторан кеча, 1 август куни тадбир учун ёпилган бўлган. “112” Telegram-канали бу тадбир “50 кишилик тўй” бўлганини ёзмоқда. “Astra” эса воқеа гувоҳига таяниб, ресторанда “генералнинг туғилган куни” нишонланганини хабар қилди.

Портлашнинг дастлабки сабаблари сифатида ресторан ошхонасидаги газ ускунасининг портлаши айтилган эди. Бироқ орадан кўп ўтмай Миллий антитеррор қўмитаси ресторан кириш қисмида аёл киши ичкарига олиб киришга уринган қўлбола бомба ҳаракатга келганини маълум қилди. Уни қўриқчи ичкарига киритмаган. Уларнинг иккаласи ва яна бир меҳмон ҳалок бўлган. 21 киши жароҳат олган.

“Коммерсантъ” маълумотларига кўра, портлаш “қаттиқ қўриқланадиган” хусусий базм пайтида содир бўлган. Металл шарчалар билан тўлдирилган бомба масофадан туриб портлатилган. Дастлабки тахминларга кўра, аёл катта эҳтимол билан қути ичида нима борлигини билмаган. У совға олиб келганини айтган. Ҳолат бўйича “Террочилик ҳаракати” (Россия Жиноят кодексининг 205-моддаси) моддаси бўйича жиноят иши қўзғатилган.

Терактнинг нишони, эҳтимол, Россия Космик-ҳарбий кучлари бош қўмондони Александр Чайко бўлган. Украин блогери Анатолий Шарий эълон қилган ресторандан олинган видеода кадр ортида аёл киши “тайёргарлик авжида, Александр бугун 55 ёшга тўлмоқда”, дейди. 27 июль куни Александр Чайко 55 ёшни қарши олган эди.

У 2026 йилнинг май ойида Космик-ҳарбий кучлар бош қўмондони бўлган. Россиянинг Украинага қарши кенг кўламли уруши бошида Чайко Бучадаги ҳарбий жиноятларга алоқадор бўлган Шарқий ҳарбий округ қўшинларига қўмондонлик қилган.

“ВЧК-ОГПУ” Telegram-канали маълумотларига кўра, байрамга ФХХ юқори лавозимли ходимлари, Мудофаа вазирлиги генераллари, депутатлар ва мулозимлар борган. Чайконинг ўзи туғилган кунини ва янги лавозимга тайинланганини биргаликда нишонламоқчи бўлган.

Полиция портлаш содир бўлган бино атрофидаги майдонни ўраб олган. Москва Транспорт департаменти кейинроқ оқшомда бошланиши ва Садовое кольцо бўйлаб ўтиши керак бўлган Тунги велофестиваль “кутилмаган ҳолат сабабли” бошқа санага қолдирилганини маълум қилган.

Эслатиб ўтамиз, жорий йилнинг 9 июнь куни эрта тонгда Москва вилоятининг Балашиха шаҳрида юз берган портлаш оқибатида генерал-лейтенант Дамир Давидов ҳалок бўлди. У Россия Мудофаа вазирлигида фронтга ракета ва артиллерия ўқ-дориларини етказиб бериш учун жавобгар офицер бўлган. Бу эса “Авиаторлар” мавзесида содир бўлган иккинчи шундай ҳодисадир. 2025 йилнинг апрель ойида худди шу ҳудуддаги портлаш оқибатида Россия Қуролли Кучлари Бош штаби Бош оператив бошқармаси бошлиғининг ўринбосари генерал-лейтенант Ярослав Москалик ҳалок бўлган эди. 9 июндаги портлаш жойи Москаликнинг автомобили портлатилган уйдан тахминан 350 метр узоқликда жойлашган.

Умуман олганда шу пайтгача 2022 йил февраль ойида Россиянинг Украинага кенг кўламли босқини бошланганидан бери камида 19 нафар россиялик генерал ҳалок бўлган.