Қирғизистон жорий йилнинг 1 октябрь куни мамлакат тарихидаги илк хусусий сунъий йўлдошини Ер атрофидаги орбитага олиб чиқишни режалаштирмоқда. Парвоз АҚШнинг Калифорния штатидаги майдончадан амалга оширилади. Бу ҳақда “Ekonomist.kg” хабар берди.

Ҳукумат раиси ўринбосари – Сув ресурслари, қишлоқ хўжалиги ва қайта ишлаш саноати вазири Эрлист Акунбеков сунъий йўлдошни тақдим этган. Унинг сўзларига кўра, қурилмадан олинадиган маълумотлардан, биринчи навбатда, қишлоқ хўжалигида фойдаланилади.

Сунъий йўлдош тасвирлари совуқ тушиши ва қурғоқчилик яқинлашаётганини кузатиш, шунингдек, қишлоқ хўжалиги экинлари ҳосилдорлигини ошириш чора-тадбирларини ишлаб чиқиш учун маълумотларни таҳлил қилиш имконини беради.

Қурилма илгари компьютерлар ва назорат-касса машиналарини йиғиш билан шуғулланган “Кыргыз электроника” корхонаси томонидан ишлаб чиқилган. Қирғизистонлик муҳандисларга уни ишлаб чиқиш ва ясаш учун 2,5 йил вақт керак бўлган.

Сунъий йўлдошнинг вазни 5 кгни ташкил этади, унинг қиймати эса 10-12 миллион сом – тахминан 130 минг долларга баҳоланмоқда.

“Кыргыз электроника” директори Илья Чёрнийнинг сўзларига кўра, сунъий йўлдош кўп функцияли бўлиб, юқори аниқликдаги камералар билан жиҳозланган. Улардан олинадиган тасвирларга, айниқса, Қишлоқ хўжалиги вазирлигида эҳтиёж юқори.

Шу билан бирга, Чёрний сунъий йўлдошни тўлиқ Қирғизистон ишланмаси деб ҳисоблаб бўлмаслигини таъкидлаган: фойдаланилган технологияларнинг катта қисми Россияда ишлаб чиқарилган. Агар қурилма тўлиқ нолдан ясалганда, бунинг учун 10-15 йил вақт талаб этилган бўлар эди.

Эслатиб ўтамиз, Қирғизистон ўз сунъий йўлдошини учирган Марказий Осиёдаги биринчи мамлакат бўлмайди. Аввалроқ, ана шундай лойиҳани хитойлик ҳамкорлар иштирокида Ўзбекистон амалга оширган эди. Август ойида Хитой компанияси “Samarkand-2028” гиперспектрал сунъий йўлдошини орбитага олиб чиққани ҳақида хабар берилган эди. Унинг борт тизими сунъий интеллект технологиялари асосида Ўзбекистонда ишлаб чиқилган модуль билан жиҳозланган.