АҚШ Давлат котиби Марко Рубио Вашингтон ва Президент Дональд Трамп маъмуриятининг ёрдамисиз Украина суверен давлат сифатида мавжуд бўлмаслигини айтди. Бу ҳақда у Ҳиндистонга ташрифи давомида журналистлар билан суҳбатда гапирди.

Рубио бу фикрларни АҚШ Украинага разведка маълумотларини етказиш ва ҳарбий ёрдам кўрсатишни атайлаб тўхтатгани ҳақидаги хабарларга изоҳ бераётганда билдирган. У Вашингтон бундай чораларни атайлаб кўрганини рад этган.

“Америка Қўшма Штатларининг, жумладан, Трамп маъмурияти даврида кўрсатган ёрдами бўлмаганида, ҳозир Украина мавжуд бўлмас эди. Украина суверен давлат сифатида мавжуд бўлмас эди”, деган Рубио.

Давлат котиби, шунингдек, АҚШ Украинадаги Starlink сунъий йўлдош алоқа тизими фаолиятини секинлаштиришга алоқадор эмаслигини билдирган. Унинг айтишича, Вашингтон хусусий компаниянинг ўз маҳсулотидан қандай фойдаланишини назорат қила олмайди. Рубио АҚШ Президенти Дональд Трамп бу қарордан олдин хабардор бўлган-бўлмаганини билмаслигини ҳам айтган.

Аввалроқ, “The Wall Street Journal” нашри SpaceX компанияси раҳбари Илон Маск Starlink тизими ишини секинлаштиришга кўрсатма бергани ҳақида хабар тарқатган эди. Нашр манбаларига кўра, Маск тизим фаолияти секинлаштирилгани оммага маълум бўлганидан кейин бу қарорни Трамп билан муҳокама қилган. Бошқа бир манба эса Маск ўзгаришлар кучга киришидан олдин ҳам бу масалани АҚШ маъмурияти вакиллари билан муҳокама қилганини айтган.

Рубио Украинадаги урушни тугатиш бўйича ҳам фикр билдирган. Унинг сўзларига кўра, ҳозир жуда мураккаб музокаралар олиб борилмоқда ва уларда Украинанинг шарқидаги Донбасс тақдири асосий масалалардан бири бўлиб турибди. Томонлар келишувга эришиш учун бир нечта янги таклифларни илгари сурган.

“Ҳар икки томон ҳам нимадандир воз кечишга рози бўлиши керак ва бу музокаралар қийин кечмоқда. Менимча, Украина учун энг муҳим мақсад – узоқ муддатли хавфсизликни таъминлаш, келажакда мамлакатга қайта бостириб кирилмаслиги ёки яна ҳужум қилинмаслигига ишонч ҳосил қилиш”, деган Рубио.

Эслатиб ўтамиз, аввалроқ Марко Рубио Украина ҳали Илон Маскнинг SpaceX компанияси томонидан ишлаб чиқилаётган Американинг Starshield ҳарбий сунъий йўлдош тизимидан фойдаланиш ҳуқуқини олмаганини айтган эди.