Россия Президенти Владимир Путиннинг умрини узайтириш бўйича бюджетдан миллиардлаб маблағ билан молиялаштирилаётган ва Президентнинг қизи Мария Воронцова томонидан назорат қилинаётган лойиҳа янги, кутилмаган иштирокчига эга бўлиши мумкин. Бу ҳақда “South China Morning Post” хабар берди.
Қайд этилишича, инсон бошини янги танага кўчириб ўтказиш технологиясини ишлаб чиққанини айтиб келаётган, можароли шуҳрат қозонган хитойлик нейрохирург Жэнь Сяопин жорий йилнинг октябрь ойида Москвада пайдо бўлган. У пойтахтдаги Склифосовский номидаги институтда беморлардан бирининг шикастланган орқа миясида 12 соатлик операция ўтказган.
“New Scientist” журналида чоп этилган мақолада Жэнь Сяопиннинг ўзи Москвадаги жамоаси жароҳат туфайли узилган орқа мия қисмини олиб ташлаганини ва уни мия ўлими ташхиси қўйилган бемордан олинган нерв тўқимаси парчаси билан алмаштирганини ёзади. Гуанси анъанавий хитой тиббиёти университетида фаолият юритаётган нейрохирург ушбу операцияни орқа мияни кўчириб ўтказиш бўйича “дунёдаги биринчи” операция деб атаган.
SCMP’га берган изоҳида Жэнь Сяопин Склифда операция ўтказганини тасдиқлаган. Нашр маълумотларига кўра, у Москвада қўлларни аллоген трансплантация қилиш, яъни оёқ-қўли кесилган беморга вафот этган донордан аъзо қисмини кўчириб ўтказиш бўйича олтита операция ҳам ўтказган.
АҚШда таълим олган Жэнь Сяопин 2010 йилларнинг ўрталарида италиялик нейрохирург Сержио Канаверо билан биргаликда инсоният тарихида илк бор инсон бошини кўчириб ўтказиш операциясини ўтказиш режасини эълон қилганида машҳур бўлган. Хитойлик олим маймунларнинг бошини янги танага кўчириб ўтказиш бўйича бир қатор тажрибалар ўтказганини, унинг италиялик ҳамкасби эса иккита мурдадан фойдаланган ҳолда инсонда шундай операцияларни ўтказишнинг жарроҳлик моделини ишлаб чиққанини даъво қилган.
Оқибатда операция тиббиёт ҳамжамияти томонидан кескин танқид қилингани, ахлоқий хавотирлар ва жамоатчиликнинг норозилиги сабабли амалга ошмай қолди. 2026 йил октябрь ойида Россия жарроҳларининг 17-съездида Жэнь Сяопин Бош вазир ўринбосари Татьяна Голикова қўлидан “Йил миссияси” мукофотини олган.
“The Moscow Times” нашрининг ёзишича, Жэнь Сяопин Россия расмийлари аъзоларни алмаштириш эвазига 150 ёшгача яшаш имконияти ҳақида мулоҳаза юритаётган Путиннинг умрини узайтириш бўйича ҳаракатларни жадаллаштираётган бир пайтда Москвада тез-тез пайдо бўлмоқда.
“The Wall Street Journal” маълумотларига кўра, Президент узоқ умр кўриши бўйича давлат лойиҳасини Воронцовадан ташқари Путиннинг эски қадрдони, Курчатов институти раҳбари Михаил Ковальчук ҳам назорат қилади. Олимлар, хусусан, ген терапияси ёрдамида ҳужайралар қаришини секинлаштириш устида ишламоқда, шунингдек, генетик ўзгартирилган мини-чўчқалар ичида инсонга кўчириб ўтказиш учун эҳтиёт аъзоларни етиштиришга ҳаракат қилмоқда. Биринчи шундай чўчқа 2030 йилга бориб пайдо бўлиши керак.
WSJ маълумотларига кўра, 2027-2029 йиллар бюджетида Путиннинг умрини узайтиришга бўлган уринишлар билан боғлиқ “Соғлиқни сақлашнинг янги технологиялари” миллий лойиҳасини амалга ошириш учун ҳукумат 17,954 миллиард рубль ажратган. Унга харажатлар кейинги йилда 12 фоизга – 5,171 миллиарддан 5,737 миллиард рублгача ортади. 2028 йилда яна шунчага – 6,495 миллиард рублгача кўпаяди. 2029 йилга бориб ажратмаларни 5,782 миллиард рублгача қисқартириш режалаштирилган. Шунда ҳам улар 2026 йилги даражадан 12 фоизга юқори бўлиб қолади.
Эслатиб ўтамиз, аввалроқ Сколково” Москва бошқарув мактабида узоқ умр кўриш давомийлигини оширишнинг давлат сиёсати, иқтисодиёт ва меҳнат бозорига таъсирини ўрганиш бўйича лаборатория ишга туширилгани ҳақида хабар берилган эди.
