Германиянинг Audi автомобилсозлик компанияси АҚШнинг Жоржия штатида илк заводини қуришни режалаштирмоқда. Лойиҳага қарийб 4,2 миллиард доллар сармоя киритилиши кутилмоқда. Бу ҳақда “Reuters” нашри маълум қилди.

Нашрнинг ёзишича, АҚШ Президенти Дональд Трамп 3 ноябрь куни бўлиб ўтадиган Конгресс сайловлари олдидан Жоржия штатида митинг ўтказган. Унда Audi компанияси АҚШда 4,2 миллиард долларлик завод қуришини эълон қилган ва бу қарорни ўзининг бож сиёсати билан боғлаган. 

Митингда Audi раҳбари Гернот Дёллнер ҳам иштирок этган. У компания АҚШ бозорига узоқ муддатли сармоя киритаётганини таъкидлаб, бу бозорга ишонч билдирган. Дёллнернинг айтишича, завод қуриш ҳақидаги қарор бир неча ойлик пухта режалаштириш ва жадал музокаралардан сўнг қабул қилинган. У, шунингдек, АҚШ Президентининг таклифини қабул қилишни компания сармоя киритаётган мамлакат ва унинг раҳбарига ҳурмат белгиси сифатида изоҳлаган.

Янги заводда йилига 200 мингтагача автомобил ишлаб чиқариш режалаштирилган. Корхонада асосан қимматбаҳо ва йирик йўлтанламаслар, жумладан, Audi Q7, Q8 ва Q9 моделларини ишлаб чиқариш кутилмоқда. Компания янги корхонада қарийб 4500 та иш ўрни яратишни мўлжаллаган. Завод 2031 йилга бориб тўлиқ ишлаб чиқариш қувватига чиқиши керак.

Трампнинг бож сиёсати қарорга таъсир кўрсатган

Audi’нинг АҚШда завод қуриш қарорига Дональд Трампнинг савдо сиёсати ҳам таъсир қилган. АҚШ импорт автомобилларга жорий этган божлар компаниянинг харажатларини оширмоқда. Audi маълумотига кўра, ўтган йили ушбу божлар сабабли компания қўшимча 1,2 миллиард евро сарфлаган.

Ҳозиргача немис автомобилсозлик компанияси АҚШ бозорига машиналарни асосан Европа ва Мексикадан етказиб келган. Маҳаллий ишлаб чиқаришни йўлга қўйиш эса импорт божлари билан боғлиқ харажатларни камайтириш имконини бериши мумкин. Шу билан бирга, Audi АҚШдаги фаолиятини кенгайтириш билан бир қаторда Германияда харажатларни қисқартиришда давом этмоқда.

Аввалроқ, компания 2029 йил охиригача Германияда 7500 тагача иш ўрнини қисқартиришни режалаштираётганини эълон қилганди. IG Metall касаба уюшмаси Audi’нинг АҚШ бозорида ишлаб чиқаришни йўлга қўйиш режасини умумий маънода қўллаб-қувватлаган. Бироқ ташкилот Германиядаги заводлар фаолияти ва ходимларнинг иш ўринлари сақланиб қолиши бўйича кафолат талаб қилган.