“Путин Европанинг бошқа бир давлатига ҳужум қилишга тайёрланмоқда” — Зеленский

Россия президенти Владимир Путин урушни кенгайтириб, Европанинг бошқа мамлакатига ҳужум қилиши мумкин. Бу ҳақда Украина президенти Владимир Зеленский нутқига таяниб, The Guardian хабар берди.

Зеленский НАТО мудофаасини синаб кўриш мақсадида Россия Европага дронлар учираётганини айтди. Бу билан Россия каттароқ урушга тайёрланаётганини прогноз қилди.

“Путин Украинадаги урушини тугатишни кутиб ўтирмайди. У бошқа йўналишда фронт очади. Қаердалигини ҳеч ким билмайди. У шуни истайди”, деди Зеленский.

Президентнинг айтишича, Россия Европа осмонини ҳимоя қилиш қобилиятини атайлаб текширмоқда. Буни сўнгги кунларда Дания, Польша ва Руминия ҳудудида аниқланган рус дронлари тасдиқлайди. Шунингдек, Россия қирувчи самолётлари Эстония ҳаво ҳудудига ҳам бузиб кирган.

26 сентябрь куни кечаси Даниядаги ҳарбий база устида, 27 сентябрь куни эса Норвегиядаги база устида дронлар парвози қайд этилган. Зеленский Европа Иттифоқи давлатлари бу янги ва хавфли таҳдидга қарши курашишда қийналаётганини айтди. Унинг сўзларига кўра, ой бошида Украина Польша томон учган 92 та дронни аниқлаган, уларнинг кўпини уриб туширган. 19 таси Польша ҳудудига ўтиб кетган ва Варшава эса уларнинг 4 тасини йўқ қилган.

“Мен кучларимизни таққослаётганим йўқ. Биз урушдамиз ва улар (Польша) урушмаяпти”, деди Украина раҳбари.

Зеленский Россия ҳаво ҳужумларини қандай қайтариш бўйича “амалий машғулотлар” олиш учун Украинага номи ошкор этилмаган бир қатор давлатлар вакиллари боришини айтди.

“Биз ўз тажрибамиз билан ўртоқлашишга тайёрмиз”, деди сиёсатчи.

Зеленскийнинг сўзларига кўра, у БМТ бош ассамблеяси доирасида Трамп билан “жуда яхши” музокаралар ўтказган. Учрашувдан сўнг АҚШ президенти Украина Европа ва НАТО кўмагида 2022-йилдан бери йўқотган барча ҳудудларини қайтариб олишига ишонишини айтган. Сўнгги ойларда Киев Россия нефтьни қайта ишлаш заводларига маҳаллий ишлаб чиқарилган узоқ масофали дронлар билан бир қатор муваффақиятли зарбалар берди.

“Агар Кремль бу қишда яна Украина энергетика инфратузилмасини вайрон қилишга уринса, Россия пойтахти қоронғиликка ботади”, деди Владимир Зеленский.