Туркиялик фермер ҳар бири 57 кг оғирликдаги карамларни етиштирди (фото)

Туркиянинг Эрзурум вилоятидаги Пасинлер текислигида меҳнат қилувчи деҳқонлар жорий йилда ўта йирик ҳажмдаги карамлар ҳосилини олди. Узоқ йиллик анъана ва аждоддан авлодга қадар сақланиб келган уруғлар ҳисобига айрим карамларнинг оғирлиги 50 килограммдан ошди. Минтақанинг унумдор ерлари ва уруғчилик тажрибаси яхши натижа олиб келди: далалар бу мавсумда ҳосилга тўлди.

Пасинлерда жами 500 гектар майдонга карам экилди. Ўртача ҳисобда бир акрдан 700 бош атрофида карам йиғилди. Умумий миқдор бўйича тахминан 350 минг дона маҳсулот Қора денгиз ва Шарқий Анадолу вилоятларига етказила бошланди.

65 ёшли фермер Ҳасби Дурсун Anadolu ахборот агентлигига берган интервьюсида оилавий ёдгорлик уруғидан 57 килограмм вазнга эга карам етиштирганини билдирди. У бунинг сабабини асрлар давомида сақланган уруғ ва анъанавий парвариш усуллар билан изоҳлади:

“Далада ишламаган куним йўқ. Мен 7 ёшимдан бери бу иш билан шуғулланаман: карамларим билан гаплашаман, уларни меҳр билан парваришлайман. Бу йилги теримдан олинган 57 килограммлик карамлар мен етиштирган энг катта ҳажмли ҳосилдир. Биз уруғимизга бошқа мамлакат уруғини аралаштирмаймиз, фақат оилавий уруғлардан фойдаланамиз. Шундай қилганимиз учун маҳсулот сифати юқори чиқади. Ана шу уруғни кейинги йилларда ҳам экамиз”, деди Дурсун.

Яна бир фермер Нуман Сертўғлу ҳам мавсумдан мамнунлигини билдириб, 50 килограммлик карамлар фақат шу ҳудуддан топилишини таъкидлади:

“Омборимиздаги баъзи уруғларнинг ёши 100 йилдан ошган. Биз боболаримизнинг услубида суғориш ва парвариш қиламиз, шунинг учун ҳосилимиз ҳам мўл ва сифатли бўлади”, деди Сертўғлу.

Умуман олганда, Пасинлер текислигида жорий йилги ҳосил аждодлардан сақланиб келаётган уруғлар ва маҳаллий деҳқонларнинг тажрибали меҳнати натижасида юқори кўрсаткичларни қайд этди. Бу эса минтақа қишлоқ хўжалиги ҳамда маҳаллий иқтисодиёт ривожи учун ижобий омил бўлиб хизмат қилмоқда. Фермерлар келгуси йилларда ҳам оилавий уруғларни сақлаб, уларни кенгроқ майдонларда экишни давом эттиришни мақсад қилган.