“Туркия F-35 қирувчиларини олиш учун С-400 тизимларидан воз кечишга тайёр” – Том Баррак

Турклар АҚШдан F-35 “бешинчи авлод“ қирувчиларини сотиб олиш учун Россияда ишлаб чиқарилган С-400 зенит-ракета тизимларидан воз кечишга тайёр. Бу ҳақда Қўшма Штатларнинг Туркиядаги элчиси Том Баррак маълум қилган.
Дипломатнинг сўзларига кўра, Анқара олти йил аввал Россиядан сотиб олинган С-400 тизимларидан фойдаланмай, омборларда сақлаяпти. Бироқ турклар ихтиёрида бундай комплексларнинг мавжудлиги Анқара–Вашингтон муносабатларида муаммоларни келтириб чиқармоқда.

“Мен ушбу масала яқин тўрт–олти ой ичида ҳал бўлишига ишонаман”, деган Баррак Абу-Даби мезбонлик қилган конференцияда.

Туркия учун ишлаб чиқарилган, аммо етказиб берилмаганФ-35 қирувчилари

Фото: Defence Security Аsiа

Туркия ва Россия С-400 ҳаво ҳужумидан мудофаа тизимларини сотиб олиш бўйича қиймати 2,5 млрд долларлик келишувни 2017-йилда имзолаган эди. Бундан ғазабланган Вашингтон Анқарани Ф-35 дастуридан чиқариб ташлаган. Қолаверса, АҚШ айрим турк мудофаа компанияларига нисбатан CААTSА санкцияларини қўллаган.

Ўшанда Оқ уй ўз қарорини руслар С-400 тизимидан Ф-35 қирувчиларининг сирларини ўғирлашда фойдаланиши мумкинлигини билан изоҳлаган эди. Шунга қарамай, орадан икки йил ўтиб Туркия зенит-ракета тизимларини қабул қилиб олди. Боиси улар мамлакатда Сурия ва Ироқдан келаётган таҳдидлардан ҳимояланиш учун зарур эди.
Том Барракнинг Туркия С-400 тизимларидан фойдаланмаётгани ҳақидаги даъволари янгилик эмас. 2024-йили маҳаллий Cumhuriyet газетаси ҳам улар жанговар навбатчиликка қўйилмагани, балки омборларда сақланаётгани ҳақида ёзиб чиққан.

Туркиянинг F-35 дастуридаги иштироки ҳамда С-400 тизимлари масаласи Дональд Трамп Оқ уйга қайтганидан сўнг яна кун тартибига чиқди. АҚШ президенти бу мавзуни туркиялик ҳамкасби билан Вашингтонда бўлган учрашувда муҳокама қилди. Турк манбаларининг ёзишича, Россия мазкур тизимларни қайта сотиб олишни таклиф қилган. Боиси Россия ўз осмонини муҳофаза қилиш учун уларга муҳтоҳ. Ҳарбий саноат комплекси эса талафотларнинг ўрнини тўлдира олмаяпти.