Украина разведкаси: Путин Трампга 12 триллион долларлик келишув таклиф қилган

Украина президенти Владимир Зеленскийнинг маълум қилишича, Украина разведкаси Кремль АҚШ президенти Дональд Трампни ўз томонига оғдириш мақсадида 12 триллион долларлик йирик иқтисодий келишув таклиф қилгани ҳақида маълумотга эга.

Зеленскийнинг айтишича, мазкур ташаббус «Дмитриев пакети» деб аталади ва у Россия томонидан музокарачи сифатида қатнашган Кирилл Дмитриев – Россия тўғридан-тўғри инвестициялар жамғармаси раҳбари номи билан боғлиқ. Ушбу таклиф Дмитриевнинг яқинда Вашингтонга амалга оширган ташрифи давомида илгари сурилгани айтилмоқда.

12 триллион доллар – бу Россиянинг йиллик ялпи ички маҳсулотидан тўрт баравардан ортиқ сумма ҳисобланади.

«Кўринадики, гап АҚШ ва Россия ўртасидаги иқтисодий ҳамкорлик пакетлари ҳақида кетмоқда. [...] Биз Америка ва Россия ўртасида шундай ёки шунга ўхшаш икки томонлама ҳужжатлар имзоланиши мумкинлиги ҳақида сигналлар олаяпмиз», – деди Зеленский украиналик журналистлар билан суҳбатда.
Украина президенти келишувнинг аниқ шартларини очиқламаган, бироқ эҳтимолий ҳужжатлар Украина суверенитети ёки хавфсизлигига дахл қилиши мумкинлигини таъкидлаган.

«Биз аниқ айтамиз – агар бундай, ҳатто эҳтимолий келишувлар Украина иштирокисиз қабул қилинса, мамлакатимиз уларни қўллаб-қувватламайди», – деди у.

Зеленскийнинг баёнотлари Wall Street Journal’нинг ўтган йил ноябридаги хабари билан боғлиқ бўлиши мумкин. Нашр америкалик тадбиркорлар ва россиялик олигархлар ўртасида учрашувлар бўлиб ўтгани ва уларда тоғ-кон ҳамда энергетика компанияларида эҳтимолий улушлар муҳокама қилингани ҳақида ёзган.
Қайд этилишича, Кирилл Дмитриев аввалроқ Дональд Трампнинг махсус вакиллари Стив Уиткофф ва Жаред Кушнер билан биргаликда 28 банддан иборат «тинчлик режаси» устида ишлаган. Ушбу режада Россияга қарши санкцияларни босқичма-босқич бекор қилиш ҳамда АҚШ–Россия иқтисодий ҳамкорлигини йўлга қўйиш таклиф этилган. Украина президенти эса, аксинча, Москвага нисбатан санкцияларни кучайтириш тарафдори эканини билдириб келмоқда.