Афсонавий Макрегордан шонли қайтиш! Оқ уйда ўтадиган UFC турнирида Конорнинг рақиби ким бўлади?

Икки вазн тоифасида собиқ UFC чемпиони, ирландиялик аралаш яккакураш (MMA) устаси Конор Макгрегор кўринишидан камбек қилишга яхшигина тайёргарлик кўрмоқда. Ўтган йилнинг охирида ирландиялик спортчи лига билан музокаралар бошлаганини айтган эди. Кейинчалик эса UFC президенти Дана Уайтнинг ўзи ҳам бу маълумотни тасдиқлаб, ёзда бўлиб ўтадиган Оқ уйдаги турнирда унинг қатнашиши мумкинлиги ҳақида айтиб ўтди. Конор ҳозирда допинг офицерларига доимий тест топшириб, тез орада қайтишига ишора бермоқда.

Бундан ташқари, UFC раҳбари билвосита шуни тан олдики, матчмейкерларда аллақачон Макгрегор учун рақиб танлаб қўйилган. Шунингдек, Уайт Конор учун икки эҳтимолий рақибнинг номзодини рад этди, бироқ бу эълонни ишонарли тарзда баён қилмади. Икки вазн тоифасида собиқ чемпионнинг узоқ кутилган қайтишига ким муносиб тарзда рақиблик қилади? Келинг кўриб чиқамиз.
Майкл Чендлер, 39 ёш

Америкалик енгил вазн тоифаси вакили ўз фаолиятидаги энг қийин даврни бошдан кечирмоқда ва унинг жанг қиладиган даври ўтиб бораётгандек кўринмоқда. Майкл Чендлер 2021 йил январида Ден Ҳукерни мағлуб этиб, лигага ёрқин тарзда кириб келганди. Кейинчалик эса Беллатор собиқ чемпионига енгил вазн чемпиони Чарльз Оливейрага қарши камар учун курашиш имконияти берилди, лекин америкалик нокаут билан мағлуб бўлди. Кейин эса Чендлернинг лигадаги фаолияти ҳавас қиладиган даражага чиқмади ва кейинги беш йилда беш жангниниг тўрттасида мағлуб бўлди (фақатгина ўша вақтда фаолияти ачинарли даражага тушиб қолган Тони Фергюсон устидан ғалаба қозонган).

Шунингдек, Майкл ҳали ҳам жанг қилишга тайёр ва ҳозирда АҚШнинг энг томошабоп ва машҳур жангчилари қаторида бўлиб турипти. Бундан ташқари, Макгрегор ва Чендлер 2024-йилнинг ёзида жанг қилиши керак эди, лекин Конорнинг жароҳати эвазига бу жанг бекор қилинган эди. Бир йил аввал эса эҳтимолий рақиблар The Ултимате Фигҳтер реалити-шоусида икки рақиб жамоанинг мураббийи сифатида рол ижро этишган эди. Чендлер қанча уринмасин Макгрегор билан жанги бўлиб ўтмаслиги маълум бўлди. Аввалроқ Уайт маълум қилдики, Конор учун бошқа рақиб изланмоқда ва Майкл ҳам бошқа рақиб билан ўз фаолиятини давом эттиришини айтиб ўтди. Лекин ҳаммаси исталган вақтда ўзгариб кетиши мумкин ва UFC Макгрегор ва Чендлер ўртасидаги жангни қайта тиклашни кўриб чиқиши мумкин.
Хорхе Масвидал, 41 ёш

Келиб чиқиши кубалик бўлган америкалик 2023 йилда ўз фаолиятини кетма-кет тўрт мағлубиятдан сўнг якунлаган эди. Ярим ўрта вазн тоифасидаги энг кучли рақиблардан ҳар томонлама ортда қолаётгани маълум бўлган Хорхе Масвидал улар билан рақобат қила олмаслигини тушуниб етган эди. Ўзининг ёшига қарамасдан BMF камарининг биринчи эгаси фолиятини тугатишни хоҳламаган эди, чунки бундан атиги тўрт йиллар аввал UFC’нинг энг машҳур юлдузлари мақомига чиқишга эришган эди. Лекин Масвидал ўзининг ҳамма ҳис-туйғуларини четга суриб, фаолиятини якунлади.

Охирги уч йилда Хорхенинг ишлари ёмон кечмади. Бу орада у Нейт Диаз билан бокс бўйича жанг қилишга улгурди (баҳсли тарзда мағлуб бўлган бўлса ҳам), бизнесга чуқур кириб борди, промоутерлик билан шуғулланди ва шунчаки дам олди. Кўринишидан унинг қайтишига ҳеч қандай белгилар йўқ эди, лекин яқиндагина унинг UFC’га қайтиши ҳақидаги хабарлар ижтимоий тармоқларда пайдо бўлишни бошлади. Хорхенинг ўзи ҳам матбуот ходимлари билан кечган учрашувда, худдики лига Макгрегор ва унинг ўртасидаги жанг устида ишлаётганини айтиб ўтди.

“Ҳозирда менинг Макгрегорга қарши бўлиши мумкин бўлган Оқ уйдаги жангимиз ҳолати ёмон эмас. Бундан ортиғини айта олмайман, лекин ҳозирча ҳаммаси ростдан ҳам яхши кечмоқда”, — дейди Масвидал.