Покистон Глобал терроризм индексида биринчи ўринни эгаллади

Иқтисодиёт ва тинчлик институти эълон қилган Глобал терроризм индекси ҳисоботига кўра, Покистон илк бор терроризм оқибатларидан энг кўп жабр кўрган давлат сифатида қайд этилди.

Ҳисоботда қайд этилишича, мамлакатда террорчилик фаоллиги кескин ошган ва хавфсизлик вазияти ёмонлашган.

2025 йил якунларига кўра, Покистонда 1139 киши ҳалок бўлган, 1045 та террорчилик ҳужуми содир этилган. Бу кўрсаткич 2013 йилдан бери энг юқори даража ҳисобланади. Шу билан бирга, ҳужумлар сони 2020 йилга нисбатан қарийб олти бараварга ошган.
Мутахассислар вазият кескинлашувини, аввало, “Таҳрики Толибон Покистон” (ТТП) фаолиятининг кучайгани билан изоҳламоқда. Мазкур гуруҳ 2025 йилда дунёдаги энг қонли террорчи ташкилотлар қаторидан жой олган. Ҳисоботда айнан ТТП қурбонлар сони ошган ягона йирик гуруҳ сифатида қайд этилган.

Таҳлилчиларга кўра, 2021 йилда Афғонистонда “Толибон” ҳокимиятга қайтгач, минтақадаги хавфсизлик муҳитида жиддий ўзгаришлар юз берган. Чегарадаги назоратнинг заифлашуви, давлат бошқаруви чекланган ҳудудларнинг мавжудлиги ҳамда икки давлат ўртасидаги зиддиятлар жангари гуруҳлар учун қулай шароит яратган.
ТТПдан ташқари, Балужистон озодлик армияси каби гуруҳлар ҳам ҳужумлар сонини ошириб, вазиятни янада мураккаблаштирган. Улар нафақат хавфсизлик кучларига, балки тинч аҳолига ҳам ҳужумлар уюштирган.
Ҳисоботда Покистон ҳудудидаги терроризм кенгроқ геосиёсий зиддиятлар билан боғлиқ экани ҳам алоҳида таъкидланган. Афғонистон–Покистон чегараси терроризмнинг асосий ўчоқларидан бири сифатида кўрилмоқда.

Глобал кўрсаткичлар бўйича 2025 йилда терроризм даражаси пасайган бўлса-да, Покистон бу тенденциядан мустасно бўлиб қолмоқда. Ҳисобот муаллифлари мамлакатдаги вазиятни барқарорлаштириш учун комплекс чоралар зарурлигини таъкидлаган.

Шунингдек, ҳисоботда рейтингнинг юқори поғоналарида асосан Африка давлатлари устунлик қилмоқда. Хусусан, Буркина Фасо, Нигер, Нигерия ва Мали каби давлатлар ҳам ўнталикдан жой олган. Шунингдек, Сурия, Сомали, Конго Демократик Республикаси, Афғонистон, Колумбия ва Исроил ҳам энг кўп зарар кўрган давлатлар қаторида қайд этилган.