ФХХ Москвада интернетни узиб қўйди - ОАВ

Москванинг айрим ҳудудларида интернет узилиши ортида Федерал хавфсизлик хизмати (ФХХ) турибди. Бу ҳақда IT бозори ва ҳукуматдаги манбаларига таяниб, The Bell хабар берди.

Маълум қилинишича, ФХХнинг илмий-техник бўлими интернетни чеклаш талаби билан алоқа операторларига мурожаат қилган. Операторларга интернет блокланиши керак бўлган базавий станциялар рўйхати берилган. Операторлар янги конфигурацияларни қўлда киритган, бу турли ҳудудларда ва турли операторларда алоқа сифати фарқланишига сабаб бўлган.
The Bell суҳбатдошларининг таъкидлашича, қарор “юқоридан туширилган”. Ҳукуматнинг ўзида ҳам бу қарорнинг сабаблари ҳақида аниқ маълумот бўлмаган. Расмий асос сифатида эса “таҳдидларга қарши кураш” кўрсатилган.

“ФХХ илмий-техник хизматидан қайси ҳудудларда интернетни ўчириш кераклиги белгиланган харита келиб тушди. Шу билан бирга, ҳуқуқ-тартибот идоралари ходимлари бу уларнинг қарори эмаслигига ишора қилган, уларга ҳам юқоридан буйруқ туширилган”, деди манбалардан бири.

Суҳбатдошлардан бири кўрган харитага кўра, узилишлар деярли бутун Москва марказини Садовое ҳалқа йўлигача, шунингдек, шимол, шарқ ва жанубдаги айрим ҳудудларни қамраб олган.

Шунингдек, интернетни ўчириш “Южний порт“, тозалаш иншоотлари, “Лосиний остров” боғининг жануби-ғарбий қисми (Президент бошқармалари шифохонаси атрофи) ва Красногорск яқинидаги “СберСити” қурилиш ҳудудини қамраб олган. Ушбу нуқталарнинг камида иккитаси илгари ОАВ томонидан ҳаво ҳужумидан мудофаа тизими ўрнатилган ҳудуд сифатида қайд этилган. Бироқ Москва мудофаа тизими мавжуд бошқа нуқталарда узилишлар қайд этилмаган.

Москвадаги шатдаун март ойи бошида бошланган. Аввалги чекловлардан фарқли ўлароқ, расмийлар деярли ҳеч қандай тушунтириш бермаган. Президент матбуот котиби Дмитрий Песков “хавфсизлик чоралари” дейиш билан чекланган. 24 март куни пойтахтнинг марказий туманларида мобил интернет кутилмаганда қайтди.

Top10VPN маълумотларига кўра, 2025 йил охирига келиб, Россия 146 миллионга яқин одамга таъсир кўрсатган узилишлар давомийлиги (37 166 соат) бўйича дунёда етакчига айланди. Бироқ 2026 йил мартигача Москва одатда бу каби чекловлар доирасидан четда қолган эди. The Bell манбаларига кўра, эндиликда бу имконият очилган ва яқин вақт ичида такрорий узилишлар яна юз бериши мумкин.