Эрон ҳарбийлари АҚШ “ўзи билан ўзи” музокара олиб бораётганини айтди

Эрон Ислом инқилоби қўриқчилари корпуси АҚШ президенти Дональд Трампнинг “музокара олиб борилаётгани” ҳақидаги даʻволарини рад этди. Бу ҳақда Reuters хабар берди.

Трамп эҳтимолий келишувлар бўйича Эрон билан музокара олиб борилаётганини айтганди. Ислом инқилоби қўриқчилари корпусини бунга жавоабн АҚШ “ўзи билан ўзи музокара ўтказаётгани”ни таʻкидлади. Бу баёнот АҚШ Теҳронга муҳокама учун 15 банддан иборат режа юборгани ҳақидаги хабарлар фонида янгради.

“Ички курашингиз даражаси (АҚШ назарда тутилган) ўзингиз билан ўзингиз музокаралар олиб бориш босқичига етдими? Бизга ўхшаганлар сиздайлар билан ҳеч қачон чиқиша олмайди. Олдин ҳам айтганимиздай... сиз билан ҳеч ким келиша олмайди. Нафақат ҳозир, балки ҳеч қачон”, деди Эрон қўшма қўмондонлиги бош вакили Иброҳим Зулфиқорий Эрон давлат телевидениеси эфирида.

Эрон раҳбарияти аввал ҳам АҚШ билан музокара олиб борилмаслигини айтганди. Сабаби Вашингтон сўнгги икки йил ичида олий даражадаги музокараларда Эронга икки марта ҳужум қилгани таʻкидланган.

“Эрон Америка дипломатияси бўйича жуда ёмон тажрибага эга”, деган Эрон ташқи ишлар вазирлиги расмий вакили Исмоил Бақоий.

У Вашингтон билан ҳеч қандай мулоқот ёки музокара олиб борилмагани, чунки Эрон мамлакатни ҳимоя қилишга эʻтибор қаратганини айтган.
Трамп 24 март куни Оқ уйда журналистларга АҚШ Эрондаги “тўғри одамлар” билан урушни тугатиш бўйича “музокаралар” олиб бораётганини айтди. У эронликлар келишувга эришишни “жуда хоҳлаётганини” қўшимча қилди.

25 март куни мазкур баёнотлар ортидан акциялар кўтарилиб, нефть нархи тушди. The New York Times газетаси 24 март куни Вашингтон Эронга Яқин Шарқдаги урушни тугатиш бўйича 15 банддан иборат режа юборгани ҳақида хабар берди. 
Исроиллик манбалар АҚШ бу режани муҳокама қилиш учун бир ойлик ўт очишни тўхтатишни сўраётганини таʻкидлади.

Режа Эрон ядровий дастурини, “Ҳизбуллоҳ” каби прокси-гуруҳларни қўллаб-қувватлашни тўхтатиш ва Ҳормуз бўғозини қайта очишни ўз ичига олади, дея хабар берди исроиллик манба.

АҚШ ва Исроил 28 февраль куни Эрон ядровий дастури бўйича музокараларда натижа бўлмаганини важ қилиб, Эронга зарбалар берди. Музокараларда воситачи бўлган Уммон эса аксинча, сезиларли ютуқлар бўлганини айтди. 2025 йил июнь ойида ҳам АҚШ Эроннинг ядровий объектларига ҳужумлар қилганди.
28 февраль куни АҚШ “Эпик ғазаб” операциясини бошлади, ҳужумларда Эрон олий раҳнамоси Оятуллоҳ Али Хоманаий ҳалок бўлди. Эрон АҚШ ва Исроил ҳужумларга жавобан уларнинг объектларига, шунингдек, Форс кўрфази давлатларининг энергетика инфратузилмасига зарбалар йўллади. Дунёдаги нефть ва суюлтирилган газнинг бешдан бир қисми ўтадиган Ҳормуз бўғозини амалда ёпиб қўйди. Бу эса нефть нархининг глобал ошишига олиб келди.
Эрон БМТ Хавфсизлик кенгаши ва Халқаро денгиз ташкилотига “душман бўлмаган кемалар” Эрон расмийлари билан келишган тақдирда Ҳормуз бўғозидан ўтиши мумкинлигини айтди.
Энг катта зарбани Осиё мамлакатлари сезмоқда, улар Ҳормуз орқали ўтадиган нефтьнинг 80 фоизидан ортиғини сотиб олади. Ҳукуматлар ёқнилғи танқислигига қарши масофавий ишлаш, рағбат пакетлари каби чораларни жорий қилмоқда. Баъзи давлатлар ҳатто мактабларни ёпиб, дам олиш кунларини эълон қилган.