Хоразм вилояти ИИБ Йўл ҳаракати хавфсизлиги бошқармаси томонидан олиб борилаётган кенг қамровли тарғибот ишларига қарамасдан, 2025 йил 25 май куни — “Сўнгги қўнғироқ” муносабати билан мактаб битирувчилари байрам кайфиятида бўлган бир пайтда, вилоятимизда ташвишли ҳолат кузатилди.

Соат 16:00 гача бўлган вақт ичида Хоразм вилояти бўйлаб 15 нафар вояга етмаган йигит-қиз томонидан автомобил бошқариш ҳолати аниқланди. Бу ҳолат нафақат қонунбузарлик, балки жонга хавф туғдирувчи фожеаларга олиб келиши мумкинлиги билан хавфлидир.

ИИБ ЙҲХБ масъулларининг маълум қилишича, аниқланган ҳолатлар юзасидан тегишли ҳуқуқий чоралар кўрилмоқда. Шу билан бирга, бу каби ҳолатларнинг олдини олиш мақсадида назорат тадбирлари кучайтирилиши белгиланган.

Ота-оналар масъулияти қайда?
Ижтимоий тармоқларда тарқалаётган видеолар ва фотосуратлар вояга етмаганлар томонидан ҳайдовчилик қилиш ҳолатлари ортиб бораётганини кўрсатмоқда. Бу эса ота-оналарнинг масъулияти, уларнинг фарзандларига нисбатан назорати ва тарбияси қай даражада эканини қайта кўриб чиқишга чорламоқда.

Йўл ҳаракати қоидаларига кўра, ҳайдовчилик ҳуқуқи 18 ёшга тўлган, тиббий кўрикдан ўтган ва тегишли гувоҳномага эга шахсларгагина берилади. Аммо қонунга зид равишда рульга ўтирган ўспиринлар нафақат ўз ҳаёти, балки бошқаларнинг ҳам ҳаётини хавф остига қўймоқда.

Фожеалар олдини олиш — ҳаммамизнинг бурчимиз

ИИБ ЙҲХБ барча ота-оналардан фарзандларини назорат қилиш, уларга ҳайдовчиликнинг жиддий масъулиятини тушунтириш, эҳтиёт чораларини кўришни қатъий сўраб қолмоқда. Бугунги кундаги фожеаларнинг кўпчилиги эътиборсизлик ва бепарволик оқибатида юз бермоқда.

Назорат тадбирлари келгуси кунларда ҳам давом этади. Жамоатчиликни ҳам бу масалада фаолроқ позиция эгаллашга, ҳуқуқбузарликларни аниқлашда ҳамкорлик қилишга чақириб қоламиз.