МУСТАҚИЛЛИГИМИЗНИНГ 35 ЙИЛЛИГИГА МУНОСИБ ТУҲФА: УРГАНЧ ДАВЛАТ УНИВЕРСИТЕТИДА ЯНГИ ЎҚУВ БИНОСИ ФОЙДАЛАНИШГА ТОПШИРИЛДИ

Ўзбекистон Республикаси давлат мустақиллигининг 35 йиллиги арафасида Урганч давлат университетининг янги, замонавий ўқув биноси тантанали равишда фойдаланишга топширилди.

8 қаватдан иборат, 1800 ўринга мўлжалланган янги ўқув биносининг очилиш маросимида Хоразм вилояти ҳокими Жўрабек Рахимов иштирок этди. Тадбирда вилоят раҳбари мазкур бинода яратилган шароитлар университет ҳаёти, таълим сифати, илмий салоҳият ҳамда ёшлар учун янги имкониятларни кенгайтиришда муҳим аҳамият касб этишини таъкидлади.

Очилиш маросимида Хоразмнинг илм-фан, таълим, санъат ва маданият соҳаларида танилган вакиллари, университет ректори Феруза Мадрахимова бошчилигидаги Кенгаш аъзолари, фахрий устозлар, профессор-ўқитувчилар ҳамда талаба-ёшлар иштирок этди.

Янги иншоот Урганч давлат университетининг 9-ўқув биноси бўлиб, унда Интеллектуал илмлар ва технологиялар факультети фаолият юритади.

Бинонинг энг муҳим жиҳатларидан бири — бу ерда замонавий ахборот технологиялари, компьютер илмлари ва IT йўналишларида таълим олиш учун зарур шарт-шароитлар яратилганидир. Хусусан, бинода ташкил этилган Сунъий интеллект лабораторияси юқори малакали мутахассисларни тайёрлаш, талабаларнинг амалий кўникмаларини ривожлантириш ва илмий изланишларни кучайтиришга хизмат қилади.

Тадбирда университетнинг фахрий устозлари ҳам сўзга чиқиб, мустақиллик йилларида мамлакатимизда таълим соҳасига қаратилаётган эътибор, илм-фанни ривожлантириш ва ёшлар учун яратилаётган кенг имкониятлар ҳақида фикр билдирди.

Замонавий ўқув биносининг фойдаланишга топширилиши Урганч давлат университетининг таълим ва илмий салоҳиятини янада ошириш, ёшларга сифатли таълим бериш ҳамда замонавий касб ва технологияларни эгаллаши учун муносиб шароит яратиш йўлидаги муҳим қадам бўлди.