MrBeast жамоаси Ичан қалъада: Хива дунёнинг энг машҳур YouTube каналига чиқади

Дунёдаги энг йирик аудиторияга эга YouTube блогери MrBeast (асл исми Жимми Дональдсон) суратга олиш жамоаси Хоразмга етиб келди. Ҳозирда гуруҳ Хиванинг тарихий юраги — Ичан қалъада ишламоқда.

Тошкентдан Хивагача

MrBeast 9 октябрь куни Ўзбекистонга келди. Бу унинг Марказий Осиёга илк ташрифи эди. Ташрифни Санъат ва маданиятни ривожлантириш жамғармаси Туризм қўмитаси билан ҳамкорликда ташкил этди. Асосий мақсад — мамлакатни халқаро аудиторияга танитиш.

Жамғарма маълум қилишича, блогернинг ўзи фақат Тошкент ва Самарқандга бориши режалаштирилган эди. Унинг ижодий жамоаси эса Бухоро ва Хивадаги тарихий обидаларни тасвирга олиш учун сафарни давом эттирди.

Тошкентда мухлислар шу қадар кўп эдики, MrBeast Ўзбекистондаги машҳурлигини кам баҳолаганини тан олди. Унинг айтишича, минглаб мухлислар машинаси ортидан эргашган. Шу сабаб Бухоро милицияси ҳам аҳолини блогернинг ўзини кутмасликка чақирган эди.

Нега айнан Ичан қалъа?

Ичан қалъа 1990 йилда ЮНЕСКО Бутунжаҳон мероси рўйхатига киритилган, Ўзбекистондаги биринчи обидадир. Қалъа деворлари ичида Калта минор, Ислом Хўжа минораси, Жума масжиди, Кўҳна Арк каби тарихий иншоотлар сақланиб қолган. Очиқ осмон остидаги музей-шаҳар камера учун тайёр декорациянинг ўзи.

Ярим миллиард томошабин

MrBeast каналларининг умумий обуначилари сони 500 миллиондан ошади. Таққослаш учун: йирик компаниялар унинг жамоаси билан ҳамкорлик учун миллионлаб доллар тўлаган. Агар Хива кадрлари видеога кирса, бу Хоразм туризми учун ҳеч бир реклама кампанияси бера олмайдиган эътибор бўлиши мумкин. 2025 йил якунларига кўра Ўзбекистон туризмдан 4,4 миллиард доллардан ортиқ соф даромад олган.

Ҳали номаълум жиҳатлар

Видео қачон ва қандай форматда чиқиши ҳозирча расман эълон қилинмаган. Жамоа Ичан қалъада айнан қайси обидаларни тасвирга олаётгани ҳақида ҳам расмий маълумот йўқ.

Xorazmbugun.uz воқеаларни кузатиб боради.