Хоразм вилоятининг қадимий ва сайёҳлар эътиборидаги шаҳарларидан бири бўлган Xivaда жиддий экологик муаммо юзага келаётгани ҳақида хавотирли хабарлар тарқалмоқда.

Маълумотларга кўра, шаҳарга яқин ҳудудда жойлашган марказий оқова сув қувурларидан бири ёрилган ёки эҳтимол, оқова сувлар атайлаб “Озерний коллектор — Дружба” каналига йўналтирилаётган бўлиши мумкин. Ҳар икки ҳолат ҳам жиддий таҳлил ва тезкор чора кўришни талаб қилади.

 БАЛИҚЛАР ҚИРИЛМОҚДА, ТАБИАТ ЗАРАР КЎРМОҚДА

Канал сувининг ифлосланиши натижасида ундаги тирик организмлар, айниқса балиқлар нобуд бўлаётгани кузатилмоқда. Бу эса нафақат экотизимга, балки аҳолининг озиқ-овқат хавфсизлигига ҳам салбий таъсир кўрсатиши мумкин.

Шу билан бирга, ушбу “Озерний коллектор — Дружба” канали орқали бошқа қишлоқ хўжалиги ерларини суғориш имконияти ҳам мавжуд. Ифлосланган сувдан фойдаланиш эса тупроқ сифатининг ёмонлашишига ва ҳосилдорликнинг пасайишига олиб келиши эҳтимолдан холи эмас.

ҲИДИ ЙЎЛГАЧА ЕТИБ БОРМОҚДА

Ҳудудда тарқалаётган нохуш ҳид нафақат атрофдаги аҳоли, балки йўловчилар учун ҳам жиддий ноқулайлик туғдирмоқда. Айниқса, асосий автомобиль йўлигача етиб бораётган бу ҳид шаҳар имижига ҳам салбий таъсир кўрсатиши мумкин.


 МАСЪУЛЛАР ЖАВОБГАРЛИККА ТОРТИЛИШИ КЕРАК

Мазкур ҳолат юзасидан тегишли ташкилотлар зудлик билан ўрганиш ишларини олиб бориши шарт. Агар қувур ёрилиши аниқланса — бу техник носозликни ўз вақтида бартараф этмаган масъуллар жавобгарликка тортилиши лозим. Агар эса оқова сув атайлаб каналга оқизилган бўлса, бу янада оғир ҳуқуқий баҳо талаб этади.

Табиат — барчамизники. Уни асраш ҳар бир фуқаронинг бурчи бўлгани каби, масъул идораларнинг ҳам бевосита вазифасидир. Xivaда юзага келган ушбу ҳолатга бефарқ қараш мумкин эмас. Вақтни бой бермасдан, муаммога ечим топиш — бугунги куннинг долзарб вазифасидир.