Ўзбекистон Россия билан катта АЭС масаласида битим имзолади

Битим Ўзбекистонда катта қувватли атом электр станциясини қуриш имкониятларини ўрганишни назарда тутади. Гап ҳар бири 1 GW қувватли иккита энергоблок (кейинчалик тўрттагача кенгайтириш эҳтимоли билан) ҳақида кетяпти. Кичик станциянинг қуввати эса аввал келишилганидек 330 MW эмас, 110 MW бўлиши мумкин. Янги битим бўйича “Росатом” берган дастлабки баёнот ёлғон бўлиб чиқди.

Фото: "Ўзатом" матбуот хизмати

“Ўзатом” агентлиги ва “Росатом” давлат корпорацияси Ўзбекистонда катта қувватли атом электр станциясини қуриш бўйича битим имзолади.

Бу ҳақда хабар берган “Росатом” баёнотидаҳужжат аввалига “Ўзбекистон Республикасида катта қувватли АЭС қуриш лойиҳасини амалга оширишнинг асосий шартлари тўғрисида” деб аталган эди.

Кейинроқ пресс-релиз таҳрирланиб, имзоланган ҳужжатнинг номи “Ўзбекистон Республикасида катта қувватли АЭС қуриш лойиҳасини амалга ошириш имкониятларини ўрганиш тўғрисида” деб ўзгартирилди.

“Ўзбекистонда кичик модулли электр станцияси замонавий кичик атом электр станциясининг сайёрадаги биринчи экспорт маҳсулотидир. Ҳозир лойиҳани кенгайтириш ва ушбу гигаваттли майдонда яна иккита йирик энергия блокини қуриш устида ишлаяпмиз”, деди “Росатом” бош директори Алексей Лихачев.

Россия ҳукумати раиси ўринбосари Александр Новакка кўра, Россия Ўзбекистонда 2 GW қувватли катта АЭС ва 110 MW қувватли кичик АЭС қуришни режалаштиряпти.

“Бугун АЭС қурилишининг аниқ иқтисодий параметрлари муҳокама қилинмоқда. Бу 1000 MW қувватга эга иккита катта энергоблок ва 55 MW қувватга эга иккита кичик блок бўлади. Биринчи марта Ўзбекистонда кичик қувватли атом станциясини қуришни амалга оширамиз”, – деди Новак Санкт-Петербург халқаро иқтисодий форумида.

“Росатом” ўз баёнотини юқорида келтирилган тарзда таҳрирлагани – “Ўзатом” томонидан ҳам пресс-релиз эълон қилиниши фонида рўй берди.

Ўзбекистон томонининг ахборотида бу битим “катта қувватли АЭС қуриш лойиҳасини амалга ошириш имкониятларини ўрганиш тўғрисида” деб номланган.

“Ҳужжат иккита ВВЭР-1000 қурилишини келгусида тўртта энергоблоккача кенгайтириш билан амалга ошириш мумкин бўлган асосий шартларни ўз ичига олади”, дейилади “Ўзатом” пресс-релизида.