Вазир Гурлан туманида

Айни пайтда Хоразм вилоятига бўлиб турган вазир Иброҳим Абдураҳмонов Гурлан туманидаги Олғон маҳалласида жойлашган “Гурлан Экспорт” МЧЖ иссиқхона хўжалигида бўлди.

 
Ушбу корхона ўзининг илғор қишлоқ хўжалиги технологияларини татбиқ этиш орқали вилоятнинг қишлоқ хўжалиги соҳасида янги босқичга чиқмоқда.
 
“Гурлан Экспорт” МЧЖ 27 гектар майдонни эгаллаб, помидор, бақлажон, бодринг ва қулупнай каби юқори талабга эга сабзавот ва мевалар етиштиради. Иссиқхона ҳудудида гидропоника усулидан кенг фойдаланилади. 17 гектар майдонда тўлиқ гидропоник тизим жорий этилган бўлиб, бу усул ўсиш жараёнини максимал даражада самарали қилиш имконини беради. Шу билан бирга, томчилатиб суғориш тизими ўрнатилган бўлиб, бу суғориш жараёнини янада тежашга хизмат қилади.
 
Корхона фаолиятининг асосий йўналишларидан бири маҳсулотларни экспорт қилишдир. “Гурлан Экспорт” МЧЖ маҳсулотларини асосан Россияга етказиб бермоқда, шунингдек, ички бозорга ҳам сифатли маҳсулотларни таклиф этади.
 
Корхона 300 нафар доимий ишчи ходимга эга бўлиб, мавсум давомида ишчи ходимлар сони 500 нафаргача оширилиши мумкин. Бу нафақат маҳаллий аҳоли учун иш ўринларини яратишга, балки туман иқтисодиётининг ривожига ҳисса қўшишга ёрдам беради.
 
Вазир Иброҳим Абдураҳмонов, корхонанинг инновацион усуллари ва юқори сифатли маҳсулотларини эътироф этган ҳолда, ишчи ходимлар сонини янада ошириш ва маҳсулотлар экспортини кенгайтириш бўйича бир қатор стратегик таклифлар илгари сурди. У, шунингдек, иссиқхона хўжаликларида илғор технологияларни янада кенгроқ жорий этиш, янги экспорт бозорларига чиқиш имкониятларини ошириш зарурлигини таъкидлади.
 
Албатта бу каби иссиқхона хўжаликлари, инновацион технологияларни жорий этиш ва маҳсулотлар экспортини кенгайтириш орқали Хоразм вилоятининг қишлоқ хўжалиги соҳасида янги босқичга чиқиш имконини яратади