Ўзбекистонда 4-маротаба “Халқаро бахшичилик санъати фестивали” ўтказилди                                                                                                                                          
Жорий йилнинг 26-28-апрел кунлари  Хивада ЮНЕСКО ва АЙСЕСКО шафелигида ИВ Халқаро бахшичилик санъати фестивали ўтказилди. Унда, дунёнинг 40 дан ортиқ давлатларидан 200 нафарга яқин вакиллар иштирок этишди.

Бахшичилик – минг йилликлар билан юзлашган халқона ва боқий санъатдир. Ҳар қайси халқнинг азалий тарихи ва маданияти энг аввало унинг оғзаки ижоди  фолклор санъатида, достон ва эпосларида мужассам топган бўлиб, улар миллатнинг ўзлигини англаш, унинг ўзига хос миллий қадриятлари ва анъаналарини сақлаш ва ривожлантиришда бебаҳо манба ҳисобланади.

Ўзбек миллий бахшичилик ва достончилик санъатининг ноёб намуналарини асраб-авайлаш ва ривожлантириш, уни кенг тарғиб қилиш, ёш авлод қалбида ушбу санъат турига ҳурмат ва эътибор туйғуларини кучайтириш, турли халқлар ўртасидаги дўстлик ва биродарлик ришталарини мустаҳкамлаш, ижодий ҳамкорлик, маданий-маънавий муносабатлар доирасини халқаро миқёсда янада кенгайтириш мақсадида, 2019-йилдан буён “Халқаро бахшичилик санъати фестивали” ўтказилиб келинмоқда.

Фестивал илк маротаба 2019-йилда Сурхондарё вилоятида ўтказилган, шунингдек, 2021-йилда Қорақалпоғистон Республикасида, 2023-йилда эса Сирдарё вилоятида ўтказилган.

26-апрел куни Хива шаҳрида ИВ Халқаро бахшичилик санъати фестивалининг тантанали очилиш маросими бўлиб ўтди. Фестивалнинг очилиш маросимида Ўзбекистон Республикаси Президент Администрасияси департаменти раҳбари Абдураҳмонов Одил Қаландарович, Ўзбекистон маданият вазири Озодбек Назарбеков, Халқаро туркий маданият ташкилоти – ТУРКСОЙ бош котиби Султан Раев, Туркий маданият ва мерос жамғармаси президенти Актоти Раимкулова, АЙСЕСКО Халқаро ҳамкорлик сектори раҳбари З.Муҳаммед, Туркий Парламент Ассамблеяси Бош котиби Меҳмет Сурейя Эр, Туркий Академия Президенти Шаҳин Мустафаев,  Озарбайжон маданият вазири Адил Керимли, Қирғиз Республикаси маданият, ахборот ва ёшлар сиёсати вазири ўринбосари Гулбара Абдукаликова ҳамда туркий давлатларнинг нуфузли олий таълим муассасалари ректорилари иштирок этишди.

Фестивалнинг очилиш маросимида Ўзбекистон Республикаси Президенти Шавкат Мирзиёевнинг  ИВ Халқаро бахшичилик санъати фестивали иштирокчиларига  байрам табригини Ўзбекистон Республикаси Президент Администрасияси департаменти раҳбари Абдураҳмонов Одил Қаландарович ўқиб эшиттирди.

26-27-апрел кунлари фестивал доирасида “Иккинчи Туркий дунё маданияти форуми” ҳамда “Янги Ўзбекистонда бахшичилик санъати: замонавий тадқиқотлар ва истиқболлар” мавзусидаги Халқаро илмий-амалий анжуман ўтказилди. Мазкур анжуманда Россия, Туркия, Озарбайжон, Қирғизистон, Қозоғистон каби давлатларнинг нуфузли илм масканларидан ташриф буюрган таниқли фолклоршунос олимлар бахшичилик санъати тарихи ва жаҳон маданияти тараққиётида тутган ўрни ҳақидаги қизиқарли маърузаларини тақдим қилдилар. Хусусан, филология фанлари доктори, профессорлар Карл Реичел, Фикрат Туркман, Эункюнг Оҳ, Ҳикмат Гулиев, Оғуз Меҳмет Ожал, Исмет Четин, Анарбой Булдибой, Селами Фидакор, Метин Экижи, Талантали Бакчиев, Гулнор Ҳусаинова, Айнур Ибраҳимова каби халқаро миқёсда таниқли фолклоршунос олимлар соҳанинг долзарб муаммолари ҳақида маъруза қилдилар.

Шунингдек, анжуманда мамлакатимизнинг турли олий ўқув юртларида, илмий-тадқиқот институтларида фаолият юритаётган фолклоршунос олимлар, бахшичилик ва халқ оғзаки ижоди масалаларига қизиқувчи тадқиқотчилар ҳам соҳага алоқадор илмий-назарий мақолалари билан фаол иштирок этдилар.