Фабио Каннаваро: “Ўзбекистон Жаҳон чемпионатида сюрприз бўлиши мумкин”

Ўзбекистон терма жамоаси устози Фабио Каннаваро Буюк Британиянинг “The Guardian” нашрига интервью берди. Италиялик мутахассис суҳбат давомида Ўзбекистондаги ҳаёти, мамлакатдаги дастлабки таассуротлари билан ўртоқлашди.

Ўзбекистон миллий жамоаси ишлаш варианти қандай пайдо бўлди?

Мен мураббийлик карьерамни бошқача бошлаганман. Бир куни Марчелло Липпи (италиялик собиқ мутахассис) менга қўнғироқ қилиб: “Хитойда жамоамни бошқаришни хоҳлайсанми? Мен спорт директори бўламан”, деди. Ўша пайтда мен “Ал-Аҳли Дубай” клубида ёрдамчи мураббий сифатида ишлар эдим. Липпи охири мени ишонтирди. Келишув бўйича, Липпи спорт директори, мен эса мураббий эдим. Орадан уч ой ўтгач, клуб билан келишмовчилик юзага келди ва мен ҳам ишдан бўшадим. Шундан кейин Хитойнинг иккинчи лигасида фаолиятимни давом эттирдим. Улар билан чемпионликни қўлга киритдим. Кейинчалик коронавирус сабаб вазият ўзгарди ва Италияга қайтишга мажбур бўлдим. Аммо у ерда менинг тажрибамни қадрлашмади. Эҳтимол, эришган ютуқларим етарли эмас деб ўйлашгандир.

Кейинчалик “Беневенто”, “Удинезе” ва “Динамо Загреб” жамоаларида ишладим. Аммо у ердаги фаолиятимни муваффақиятли бўлган дея олмайман. Шундан сўнг, Ўзбекистон миллий жамоасида ишлаш имконияти пайдо бўлди. Ўзбекистон ёш ва истеъдодли футболчиларга эга мамлакат. Федерация эса академияларга катта эътибор қаратади. U-17, U-19 ва U-23 жамоалари Осиёда кўплаб совринларни қўлга киритган.

Ўзбекистонда қандай қабул қилишди?

Биз бир ой давомида турли шаҳарларга Ўзбекистон чемпионати ўйинларини томоша қилишга бордик. Улар бунга ўрганмаган экан. Чунки кўплаб хорижлик мураббийлар бир нечта ўйинларни томоша қилиб, ватанига қайтиб кетишган. Биз 40 кун давомида турли шаҳарларга бордик, мамлакат чемпионатидан ўрин олган кўплаб учрашувларни стадиондан томоша қилдик. Ҳали қилиниши керак бўлган ишлар кўп: Жаҳон чемпионатидаги ўйин суръати Ўзбекистон чемпионати ўйинларидан тубдан фарқ қилади. Биз шу фарқни имкон қадар камайтиришимиз керак.

Мамлакат ҳақида илк таассуротлар:

Биз Тошкентда яшаймиз. Шаҳар катта, эски ва янги қисмлари бир-бирига уйғунлашган. Одамлари жуда яхши ва очиқ. Бу ерга тезда кўникдик. Самарқандга ҳам бордик. Мазкур шаҳар жуда чиройли экан. Ҳар жойда бўлгани каби бу ерда ҳам яхши ва унча яхши бўлмаган томонлар бор. Ҳозирча энг катта муаммо — ҳавонинг ифлосланиши. Қолган барча шароитлар кўнгилдагидек. Федерация бизга янги қурилган спорт марказини тақдим этди.

Жамоа билан мақсадлар:

Мазкур Жаҳон чемпионати биз учун тажриба бўлади. Орадан олти ой ўтиб Осиё Кубоги бошланади ва ўша мусобақада қандай даражада эканлигимизни аниқроқ кўриш мумкин. Шу пайтгача амалга оширилган ишлар ҳақида гапирмоқчи эмасман: жамоани айнан улар Жаҳон чемпионатига олиб чиқди. Мен эса шу пойдеворни янада мустаҳкамлаб, жамоага Европа футбол маданиятини олиб киришни истайман.

Ўзбекистонлик қайси футболчи Жаҳон чемпионатида кашфиёт бўлиши мумкин?

Таркибда яхши футболчилар бор. Аммо улар ўз устида ҳали кўп ишлаш керак, чунки жисмоний жиҳатдан Европа жамоаларига тенглашиш осон эмас. Лекин ўзбек футболчилари жуда бардошли — жанг қилади, таслим бўлмайди. Уларга қарши ўйнаш осон эмас. Масалан, Уругвай билан ўйнаганимизда тўққиз нафар асосий таркиб футболчисида жароҳат бор эди, оптимал ҳолатда эмасдик, лекин барибир мардонда жанг кўрсатди.

Футболчилар билан қайси тилда гаплашасиз?

Мен инглиз тилида мулоқот қиламан. Улар тушунади. Шунингдек, таржимон ҳам бор. Бугунги кунда таржимон бизга жуда зарур. Ўзбек тилини ўрганишим қийин, сабаби аввал инглизчада яхшироқ гапиришни ўзлаштиришим керак.

Сизнинг Осиё билан алоқангиз кучли: БАА, Хитой, энди эса Ўзбекистон. Бунинг сабаби нима?

Бу шунчаки имкониятлар эди. Мен бир жойда тинч яшай олмайман. Оддий, анъанавий мураббийлик йўлини хоҳлаганман, лекин менга бундай йўл насиб қилмаган. “Удинезе” мен учун катта тажриба бўлган. Ҳозир бошқа ерда тажриба тўплаяпман, лекин барибир италиялик мураббийман ва бир кун келиб ўз юртимга қайтиб, Италияда ҳам нималарга қодирлигимни исботламоқчиман.