Энди “дом” қурганлар жавобгарликка тортилади, агар...

Ўзбекистонда кўп квартирали уй-жойларни рухсатсиз қурганлик учун жавобгарлик чораларини кучайтириш назарда тутилмоқда. Бу ҳақда бугун, 13 январь куни Олий Мажлис Қонунчилик палатасининг навбатдаги мажлисида сўз борди. 

Унда бино ва иншоотларнинг зилзилабардошлиги ҳамда сейсмик хавфсизлигини таъминлаш соҳасида давлат назорати ва бошқарувини янада такомиллаштиришга қаратилган қонун лойиҳаси биринчи ўқишда кўриб чиқилди ва маъқулланди. 
Қонун лойиҳаси билан “Маъмурий жавобгарлик тўғрисида”ги кодексга тегишли ўзгартиришлар киритилиб, кўп квартирали уй-жойларни рухсатсиз қурганлик учун маъмурий жавобгарлик белгиланмоқда. Шунингдек, мазкур қоидабузарлик такроран содир этилган тақдирда, жиноий жавобгарлик белгилаш таклиф этиляпти.
Қонун лойиҳаси мамлакатда ноқонуний қурилишларнинг олдини олиш, аҳолининг уй-жойга бўлган талабини қондириш ҳамда шаҳарсозлик соҳасида ҳуқуқбузарликларни камайтириш мақсадида ишлаб чиқилган. 
Мажлисда ваколатли органлар рухсатисиз ўзбошимчалик билан турар-жой биноларини қуриш ҳолатлари сақланиб қолаётгани, айрим объектларда сейсмик хавфсизлик талабларига тўлиқ риоя этилмаётгани соҳадаги давлат бошқарувини янада кучайтиришни тақозо этаётгани урғуланган. 

Шаҳарсозлик кодексида эса “мастер режа” тушунчаси шаҳарсозлик ҳужжатларининг алоҳида тури сифатида мустаҳкамланмоқда. Парламент матбуот хизматига кўра, ушбу ҳужжат ҳудудларнинг аниқ муаммоларини бартараф этиш, шаҳарсозлик, ижтимоий-иқтисодий ва экологик ечимларни уйғунлаштириш, шунингдек, ҳудудларни қисқа, ўрта ва узоқ муддатли ривожлантиришни режалаштиришга хизмат қилади. 

Бундан ташқари, қонун лойиҳасида кўприклар ва тоннеллар, шунингдек, потенциал хавфи юқори бўлган объектларни лойиҳалаштириш ва қуриш учун бериладиган лицензияларнинг амал қилиш муддатини чекланмаган ҳолда белгилаш амалиётини бекор қилиш, қурилиш-монтаж ишларини бошлашда хабардор қилиш тартибидан рухсатнома бериш тизимига ўтиш назарда тутилмоқда.