Centrum'нинг 507 минг сўмлик авиабилети Silk avia'нинг 180 минг сўмлик авиабилети сингари бўлмайдими?

Кеча тармоқларда Centrum авиакомпанияси Тошкентдан Урганчга 507 минг сўмдан бошланадиган авиақатновлар қўйгани ҳақида хабарлар пайдо бўлди. Текшириб кўрдим, масалан, айни дамда 11 май санасига 598 618 сўмдан бошлаб чипта бор. Худди шу санага ҳавошканинг боласи, ҳужжати бўйича лоукостер бўлган, балки энг кўп субсидия оладиган Silk avia' чиптаси 1 274 753 сўмдан бошланади.

Мен билмайман, Centrum Тошкентдан Урганчга қандай қилиб 2,2 баробар арзон нархда қатновни йўлга қўя олмоқда ва бу қанчага чўзилади (балки Урганчдан учиб кетадиган кесишувчи рейслар ҳисобига). Ҳар сафар Давлат раҳбари маҳаллий авиақатновлар бўйича қимматчилик ва чипта йўқлиги билан боғлиқ расво ҳолатни танқид қилганида бир муддат вазият ўзгаради, лекин кўп ўтмай,  аҳвол яна ўзининг эски ҳолатига қайтиб қолаверади.

Шунчаки яна бир бор эслаш учун, 3 йил аввал миллий лоукостер деб эълон қилинган, имтиёзлар ва субсидиялар охурида ташкил этилган Silk avia 180 минг сўмдан бошланадиган авиачипталар билан бозорга кириб келганди. Лекин бу узоққа чўзилмаган, бир неча ҳафта ўтмай, Silk avia чипталари нархи аввал ҳавошканиники билан бир хиллашиб қолган ва кейин Silk avia ҳавошка боласига айлангач, ҳавошканикидан ҳам қимматлашиб кетганди. Масалан, шу 11 май санасига чипта нархи ҳавошкада 1 100 475 сўмдан бошланади, яъни Silk avia'дан арзонроқ.

Нима бўлгандаям, Centrum'нинг Урганчга 507 минг сўмлик қатнови узоқроқ давом этсин ва айтайлик,  Centrum авиакомпанияси вилоят футбол клуби учун расмий ҳамкор ҳисобланган Андижонга ҳам шунақа қатновлар йўлга қўйилсин. Бунинг учун бизга эркин бозор керак ва қиммат авиаёқилғи билан бозорни ўлдираётган тўймас аждарҳо маҳв этилиши зарур.

Айтгандай, Рақобат қўмитаси маъмурий ва илҳомланадиган боши бир бўлган Темир йўллари ва ҳаво йўллари авиакомпаниялари ўзаро тил бириктирганлиги ҳолатини текшириши керак. Чунки икки йилдирки айнан темир йўллари монополисти поезд чипталари учун нархларини ошириши ортидан авиачипталар нархи ҳам ошади. Авиачипталарнинг ўтган 3 ойда 1,74 карра ошиши ҳам шундай тўлқинда юз берди.