“Хоразмда имтиҳон маркази нега очилмаяпти? Ортда манфаат йўқми?”

Хоразмда бир неча ойдан бери Ягона интерактив давлат хизматлари марказига (ЙИДХМ) боғланган имтиҳон маркази ёпилган. Расмий баёнотларга кўра, марказ “15 кунга вақтинча ёпилди”, дейилган эди. Аммо орадан икки ойдан ошди – имтиҳонлар, ҳайдовчилик гувоҳномасини олиш истагидаги фуқаролар ҳали-ҳануз бошқа вилоятларга боришга мажбур бўлишмоқда.

Саволлар кўп, жавоблар йўқ
 • Нега 15 кунлик ремонт икки ойдан ошди?
 • Ремонт ҳақиқатда тугамаганми ёки бу фақат расмий баҳонами?
 • Нега бу борада ҳеч қандай аниқ муддат, расмий баёнот, тушунтириш йўқ?
 • Имтиҳон маркази ёпилиши – янги қурилаётган хусусий имтиҳон маркази билан боғлиқми?

Жамоатчилик орасида кенг тарқалган гумонлардан бири – Чолиш йўлидаги янги хусусий имтиҳон маркази. Кузатувларга кўра, айни пайтда бу ерда шахсий сектор томонидан замонавий имтиҳон маркази қурилмоқда. Эътиборли жиҳати – давлат маркази ишламай қолган, лекин хусусий марказ эса қурилмоқда.

Нархлар қаергача боради?

Агар Хоразмдаги давлат имтиҳон маркази расман ёпилиб, ўрнига хусусий марказ иш бошласа, унда бошқа вилоятлардагидек нархлар 1 миллион сўм ва ундан юқори бўлиши эҳтимоли катта. Бу эса коррупсиявий рисклар, хизматларнинг тижоратлашуви ва оддий фуқарога ортиқча харажат бўлишини англатади.

Мақсад нима?

Давлат хизматларининг хусусий секторга берилиши – бу ислоҳотми ёки монополиями? Нега бундай ўзгаришлар ҳақида жамоатчиликка тушунтириш берилмаяпти? Ҳозирги ҳолатда қуйидаги эҳтимолларни кўриб чиқиш мумкин:
 1. Расмий узр – ремонт. Аммо бу “ремонт” нега бу қадар чўзилди? Қурилиш якунлангани ҳақида ички манбалар бор, бироқ марказ ҳануз ёпиқ.
 2. Хусусий секторга йўл очиш. Давлат маркази ёпилиб, энди фуқаролар фақат хусусий марказ хизматидан фойдаланишга мажбур бўлишадими?
 3. Нархлар эркинлашади. Бу эса оддий фуқаронинг чўнтагига биринчи зарба.

Биз талаб қиламиз:

 • Хоразмдаги расмий имтиҳон марказининг айни ҳолати ҳақида очиқ, расмий баёнот;
 • Ремонт қачон тугайди, нега чўзилмоқда, расмий сабаб ва жавобгарлар ким?;
 • Хусусий марказ очилиши билан боғлиқ ҳар қандай манфаатлар тўғрисида шаффоф ахборот;
 • Фуқароларнинг асосий ҳуқуқи – арзон, шаффоф ва қулай давлат хизматлари кафолатланиши керак.х