Самарқанд вилоятида 20 килограммдан ортиқ экстракцияли опийнинг ноқонуний олиб кирилишига чек қўйилди. Бу ҳақда Давлат хавфсизлик хизматининг вилоят бошқармаси маълум қилди.

Маълум қилинишича, Форс кўрфази мамлакатларидан бирининг 1971 йилда туғилган фуқароси шахсига аниқлик киритилаётган қўшни республика фуқароси билан тил бириктирган. Улар Renault русумли юк автомобилида гиёҳвандлик воситасини хориждан Ўзбекистонга олиб кирган. 

Самарқанд вилояти Божхона ва Ички ишлар бошқармалари билан ҳамкорликда ўтказилган тезкор-қидирув тадбирлари давомида хорижлик фуқаро вақтинча истиқомат қилаётган Иштихон туманидаги уйи кўздан кечирилган. Натижада соф оғирлиги 20 килограмм 239 грамм бўлган экстракцияли опий аниқланиб, процессуал тартибда расмийлаштириб олинган.

Қайд этилишича, наркотик модда юк автомобилининг яширин жойига ҳамда иккита аккумулятор ичига яширилган ҳолда олиб келинган.

Ҳозирда хорижлик фуқаро ва бошқаларга нисбатан Жиноят кодексининг 246-(Контрабанда) ва 273-моддалари (гиёҳвандлик воситаларини, психотроп моддаларни ёки уларнинг аналогларини ўтказиш мақсадини кўзлаб қонунга хилоф равишда тайёрлаш, қайта ишлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) билан жиноят иши қўзғатилган. Тергов ҳаракатлари доирасида ушбу ҳолатга алоқадор шахсларни аниқлаш чоралари кўрилмоқда.

Эслатиб ўтамиз, аввалроқ Бухоро вилоятида ўз уйида 2 минг сўмлик қалбаки банкноталарни ва гиёҳвандлик воситаларини сақлаган шахс қўлга олингани ҳақда хабар берилган эди.